ەكۆادوردا ەل تاريحىنداعى ەڭ جاس پرەزيدەنت سايلاندى

 15-قازان كۇنى ەكۆادوردا پرەزيدەنت سايلاۋىنىڭ ەكىنشى كەزەڭى اياقتالدى. وندا ەل پارلامەنتىنىڭ بۇرىنعى دەپۋتاتى دانيەل نوبوا جەڭىسكە جەتتى. Kazinform اگەنتتىگى بۇل تۋرالى DW عا سىلتەمە جاساپ حابارلايدى.

نوبوانىڭ سايلاۋداعى قارسىلاسى «ازاماتتىق ريەۆوليۋتسيا» سولشىل قوزعالىسىنىڭ كانديداتى لۋيسا گونسالەس بولدى.

داۋىستاردىڭ 90 پايىزى سانالىپ بولعاننان كەيىن ەكۆادوردىڭ ۇلتتىق سايلاۋ كەڭەسى نوبوانىڭ جەڭىسىن مەرزىمىنەن بۇرىن جاريالادى. گونسالەس قارسىلاسىن جەڭىسىمەن قۇتتىقتادى.

35 جاستاعى نوبوا - ەكۆادور تاريحىنداعى ەڭ جاس پرەزيدەنت.

ونىڭ اكەسى، كاسىپكەر الۆارو نوبوا دا بۇعان دەيىن بىرنەشە رەت پرەزيدەنتتىك سايلاۋعا تۇسكەن.

سايلاۋالدى ناۋقان كەزىندەگى ساۋالنامالاردا كىشى نوبوا اۋتسايدەرلەردىڭ ءبىرى بولدى، ال ءبىرىنشى پرەزيدەنتتىك سايلاۋدا ول نەبارى 24 پايىز داۋىس جيناپ، گونسالەستەن جەڭىلىپ قالعان. ول كەزدە كانديداتتاردىڭ ەشقايسىسى 50 پايىز داۋىس جيناي الماعاندىقتان، نوبوا ەكىنشى تۋرعا ءوتتى.

ەكۆادوردا پرەزيدەنتتىك سايلاۋ مەرزىمىنەن بۇرىن ءوتتى، ونى 2023 -جىلدىڭ مامىرىندا قازىرگى مەملەكەت باسشىسى گيلەرمو لاسسو جاريالادى.