كۇن باتارەياسىمەن جۇرەتىن جاڭا ۆەلوموبيلمەن تانىسىڭىز

Elf 3.0-دى قالا ىشىندە جۇرۋگە ارنالعان ەلەكتر كولىگى (NEV) رەتىندە جىكتەۋگە بولادى. 

New Atlas سايتىندا جاريالانعان ماتەريالدىڭ نەگىزىندە Aikyn.kz جاڭا ۆەلوموبيلمەن تانىستىرادى.

14 جىل بۇرىن كوپشىلىك العاش رەت Elf تۋرالى ەستىگەن ەدى. بۇل - توبەسىندەگى كۇن پانەلى ارقىلى زاريادتاۋعا بولاتىن پەدالدى ءارى ەلەكترلى ۆەلوموبيل بولاتىن. ەندى ونىڭ جاڭا نۇسقاسى پايدا بولادى. ول اناعۇرلىم جايلى، قۋاتتى بولادى جانە ەكى جولاۋشىعا ارنالعان.

سولتۇستىك كارولينا شتاتىنىڭ دارەم قالاسىندا ورنالاسقان Organic Transit كومپانياسى جاساعان باستاپقى Elf نەگىزىنەن جابىق ءۇش دوڭگەلەكتى كولىك بولاتىن. ونىڭ اليۋمينيي جاقتاۋى، ءبىر ورىندىعى، ارتقى جۇك ءبولىمى، ۆاكۋۋمدىق قالىپتاۋ ادىسىمەن جاسالعان ABS- كومپوزيت كورپۋسى جانە پوليكاربوناتتان جاسالعان الدىڭعى اينەگى بولدى.

ول 750 ۆ ت قۋاتتى تۇراقتى ماگنيتتى قوزعالتقىشپەن جابدىقتالعان ەدى. قوزعالتقىش 88,8 ۆليتي-يوندى اككۋمۋلياتور بلوگىنان قۋات الاتىن. جۇرگىزۋشىلەر پەدال تەبۋ نەمەسە قوسىمشا اككۋمۋلياتور ورناتۋ ارقىلى ءجۇرىس قورىن ارتتىرا العانىمەن، ءبىر اككۋمۋلياتور بلوگى ءبىر زاريادپەن شامامەن 48 شاقىرىم جەتەتىن.

ونىڭ اككۋمۋلياتورىن ستاندارتتى روزەتكادان ەكى ساعاتتا زاريادتاۋعا بولاتىن. سونىمەن قاتار Elf توبەسىنە ورناتىلعان 60 ۆت فوتوەلەكترلىك پانەلمەن جابدىقتالعان ەدى. ول جەتكىلىكتى كۇن ساۋلەسى تۇسسە كولىك تۇراقتا تۇرعان كەزدە اككۋمۋلياتوردى قوسىمشا زاريادتاپ تۇراتىن.

باستاپقى Elf كەيىن 2.0 مودەلىمەن الماستىرىلدى، ال ەندى Organic Transit كومپانياسى جاقىندا Elf 3.0 ساتىلىمعا شىعاتىنىن حابارلادى. ونىڭ ەرەكشەلىگى نەدە؟

باستاپقى مودەلدە تەك الدىڭعى اسپا بولسا، 3.0 نۇسقاسىندا الدىڭعى دا، ارتقى دا اسپا (پودۆەسكا) بولادى. سونىمەن قاتار 2.0 مودەلىندە 100 ۆ ت فوتوەلەكترلىك پانەل قولدانىلسا، 3.0 نۇسقاسىندا بۇل كورسەتكىش 200 ۆ ت-قا دەيىن ۇلعايتىلعان. قاجەت بولسا، ونى 400 ۆ ت-قا دەيىن ارتتىرۋعا بولادى. سىيىمدىلىعى باستاپقى مودەلمەن سالىستىرعاندا شامامەن 2 ەسە ۇلكەن اككۋمۋلياتور باتارەياسى دا ستاندارتتى جيناققا كىرەدى.

ءيا، ەندى جۇرگىزۋشىلەر وزىمەن بىرگە ءبىر جولاۋشىنى وتىرعىزا الادى. ول جۇرگىزۋشىنىڭ ارتىنداعى ورىندىقتا وتىرادى. كولىكتە ارتقا قاراي اشىلاتىن ءبۇيىر ەسىكتەر بولادى.

تاعى ءبىر جاڭا ەرەكشەلىك - باعدارلامالاناتىن ترانسميسسيا. ول Elf 3.0-دى 1، 2 نەمەسە 3-سىنىپتاعى كولىك قۇرالى رەتىندە، نە بولماسا قالا ىشىندە جۇرۋگە ارنالعان ەلەكتر كولىگى (NEV) رەتىندە جىكتەۋگە مۇمكىندىك بەرەدى. سوعان سايكەس ونىڭ ەڭ جوعارى جىلدامدىعى دا وزگەرەدى.

شىن مانىندە، Organic Transit كومپانياسىنىڭ نەگىزىن قالاۋشى ءارى باس ديرەكتورى روب كوتتەردىڭ ايتۋىنشا، 3.0 مودەلدەرىنىڭ كەيبىرى ءتىپتى ۆەلوسيپەد تەبۋگە ارنالعان جابدىقپەن قامتىلمايدى. «بۇل ۆەلوسيپەد تەبە المايتىن مۇمكىندىگى شەكتەۋلى ادامدار ءۇشىن نەمەسە مۇلدە ۆەلوسيپەد تەپكىسى كەلمەيتىندەر ءۇشىن قۇنىن تومەندەتەدى»، - دەيدى ول.

كولىككە ەلەكتروندىق يمموبيلايزەر دە ورناتىلادى. ول قۋات ءوشىپ تۇرعان كەزدە كولىكتىڭ قوزعالۋىنا جول بەرمەيدى. ۇرلانعان جاعدايدا يەسى كولىكتىڭ ورنالاسقان جەرىن باقىلاي الادى.

باسقا سيپاتتامالارىنا كەلسەك، 3.0 ءالى دە 750 ۆ ت قوزعالتقىشپەن جابدىقتالادى.

ەسەپتەلگەن ءجۇرىس قورى 322 شاقىرىم بولادى. ۆەلوموبيلدە تولىققاندى جارىقتاندىرۋ جۇيەسى بولادى. جالپى سالماعى - 73 كەلى. جۇرگىزۋشى، جولاۋشى جانە جۇك ءۇشىن جالپى كوتەرۋ قابىلەتى - 250 كەلى. اككۋمۋلياتوردى تولىق زاريادتاۋ 2,5 ساعاتقا سوزىلادى.

Organic Transit قازىرگى ۋاقىتتا 3.0 مودەلدەرىنىڭ العاشقى پارتياسىن ءوندىرۋدى قارجىلاندىرۋ ءۇشىن WeFunder پلاتفورماسىندا قاراجات جيناۋدى اياقتاۋدا. سونىمەن قاتار كومپانيا ساتىپ الۋشىلاردان 50 دوللار كولەمىندە الدىن الا تاپسىرىس قابىلداۋدا. كومپانيا بازالىق باعانى 7500 ا ق ش دوللارى دەڭگەيىندە بەلگىلەۋدى جوسپارلاپ قويعان.