جەزقازعاندىق «جاس ساقشىلار» تانىمال ءاندى ءوز نۇسقالارىندا شىرقادى

استانا. قازاقپارات - جەزقازعانداعى №3- مەكتەپتىڭ «جاس ساقشى» سىنىبىنىڭ وقۋشىلارى تانىمال «رۋح» ءانىن ءوز نۇسقالارىندا شىرقادى. بالالار بەينەباياندارىندا جول قوزعالىسى ەرەجەلەرىن، قوعامدا تازالىق پەن ءتارتىپتى ساقتاۋدىڭ ماڭىزى تۋرالى ايتتى، - دەپ حابارلايدى ماسساگەت.

بۇل ىشكى ىستەر مينيسترلىگىنىڭ جاستاردى پاتريوتيزم مەن وتانعا دەگەن سۇيىسپەنشىلىككە تاربيەلەۋگە، ولاردىڭ قۇقىقتىق ساناسىن نىعايتۋعا باعىتتالعان باستاماسىنىڭ ءبىر بولىگى بولدى.

بيىل ۆەدومستۆو قىزمەتتىك بورىشىن ورىنداۋ كەزىندە ەرلىكپەن قازا تاپقان ىشكى ىستەر ورگاندارىنىڭ قىزمەتكەرلەرىنىڭ ەسىمىن ۇلىقتاۋ بويىنشا بەلسەندى جۇمىس جۇرگىزىپ جاتىر. رەسپۋبليكا مەكتەپتەرىندە «جاس ساقشى» پوليتسيا سىنىپتارى مەن العاشقى اسكەري دايىندىق كابينەتتەرى اشىلىپ، وندا قازا تاپقان قىزمەتكەرلەردىڭ ەسىمدەرى بەرىلىپ جاتىر.

اتالمىش باستاما وقۋشىلارعا قۇقىق قورعاۋ ورگاندارىنداعى قىزمەتتىڭ ماڭىزدىلىعىن تۇسىنۋگە كومەكتەسەدى، سونىمەن قاتار زاڭعا دەگەن قۇرمەتتى قالىپتاستىرۋعا ىقپال ەتەدى.

قازىرگى ۋاقىتتا قازاقستاندا 110 «جاس ساقشى» سىنىبى جۇمىس ىستەيدى.