جىگىتتەر، حايپ ارزان، پرانك - قىمبات: ورىنسىز ءازىلدىڭ جازاسى قانداي

استاناداعى ەڭ رەزونانستى جاعدايلاردىڭ ءبىرى تۇرعىن ءۇي كەشەنىندە بولعان. بلوگەرلەر قاراڭعى ليفتكە ءمايىت ماكەتى مەن بالتا قويىپ، كەزدەيسوق ادامدى شوشىتقان. وقيعا پوليتسياعا دەيىن جەتىپ، ۇيىمداستىرۋشى 30 تاۋلىككە قاماۋعا الىندى، قالعان قاتىسۋشىلار 15 تاۋلىككە قامالدى.

وسىعان ۇقساس تاعى ءبىر جاعدايدا 26 جاستاعى استانالىق تۇرعىن ليفت ىشىندە قورقىنىشتى كوستيۋم كيىپ، قىزدىڭ ۇرەيىن ۇشىرعان. الەۋمەتتىك جەلىگە جۇكتەلگەن ۆيدەو تاعى دا ءتارتىپ ساقشىلارىنىڭ نازارىنا ىلىگىپ، ەر ادام ۇستالدى. سوت ونى 10 تاۋلىككە قامادى.

تاعى ءبىر جاعداي اۋەجايدا تىركەلدى. الماتى تۇرعىنى رەيسكە تىركەلۋ كەزىندە «تىيىم سالىنعان زاتتار بار ما» دەگەن سۇراققا «ءيا» دەپ ازىلدەگەن. ويىننان وت شىعىپ، اۋەجايدىڭ جۇمىسى ءبىراز ۋاقىتقا تەجەلگەن. «ءازىلقوي» جولاۋشى «ۇساق بۇزاقىلىق» بابىمەن جاۋاپقا تارتىلدى.

بلوگەر ارۋجان ايبەكوۆانىڭ قىتايدا تۇسىرگەن پرانك ۆيدەولارى دا ءساتسىز اياقتالدى. ول كوشەدە ادامدارعا بىلدىرمەي تەلەفون ۇستاتىپ، كەيىن «ۇرلادىڭىز» دەپ شوشىتقان. ونىمەن شەكتەلمەي، بەيتانىس ادامداردىڭ قولىنان ۇستاپ، دەنەسىنە جاناسىپ، ەرسى ارەكەتىن جەلىگە جاريالاعان. بۇل ارەكەتتەر قىتاي قوعامىندا سىنعا ۇشىراپ، جەكە شەكارانى بۇزۋ رەتىندە قابىلداندى. اقىرى بلوگەر ءساتسىز ۆيدەولاردى ءوشىرىپ تىندى.

ءازىل فورماتىنداعى «قارا جارناما» دا كوپشىلىكتىڭ كوڭىلىنەن شىعا قويمادى. الماتىداعى ەرلەردىڭ كيىمىن ساتاتىن دۇكەن يەلەرى «زورلىق» تاقىرىبىن قولدانعان روليك جاريالاپ ەل نازارىن اۋدارماق بولعان. ۆيدەودا كيىمدەر «زورلىق قۇرباندارىندا بولعان زاتتار» دەپ سيپاتتالعان. قولدانۋشىلار مۇنى ورىنسىز ءارى شەكتەن شىققان كونتەنت دەپ باعالاپ، جاپپاي شاعىمدانعان.

ىشكى ىستەر مينيسترلىگىنىڭ مالىمەتىنشە، زاڭداعى جازاعا قاراماستان، مۇنداي جاعدايلار جيىلەپ بارادى. 2025 -جىلدىڭ العاشقى جارتىسىندا عانا 24 ادام اكىمشىلىك جاۋاپكەرشىلىككە تارتىلعان.

ال دەپۋتاتتار زاڭعا تومپاق پرانك جاساعانداردىڭ اككاۋنتىن بۇعاتتاۋدى ۇسىنىپ ءجۇر.

اۆتور

ەسىمجان ناقتىباي