جيىن-تەرىم اياقتالۋعا جاقىن: استىق ساقتايتىن قويمالار جەتكىلىكتى مە

استانا. KAZINFORM - ەلىمىزدە استىق جيناۋ جۇمىستارى اياقتالىپ قالدى. ەندىگى ماقسات - ساقتاۋ شارالارىن جۇيەلى ۇيىمداستىرۋ.

وسى رەتتە، اۋىل شارۋاشىلىعى مينيسترلىگىنە حابارلاسىپ، استىق ساقتايتىن قويمالاردىڭ جاعدايىن سۇراپ بىلگەن ەدىك.

بەلگىلى بولعانداي، ەلىمىزدە ساقتاۋ سىيىمدىلىعى 13,2 ميلليون توننادان اساتىن 191 ليسەنزيالانعان استىق قابىلداۋ كاسىپورنى بار ەكەن.

«استىقتى قابىلداۋ ءۇشىن استىق وڭدەۋ زاۋىتتارىنىڭ ماتەريالدىق-تەحنيكالىق بازاسىن دايىنداۋ جۇمىستارى جوسپارلى جۇرگىزىلدى. اۋىل شارۋاشىلىعى تاۋارىن وندىرۋشىلەردىڭ يەلىگىندە سىيىمدىلىعى 15,8 ميلليون توننانى قۇرايتىن استىق ساقتاۋ قويماسى بار. بولجانعان استىق كولەمىن ەسكەرسەك، كونتەينەرلەر استىقتى ساقتاۋعا جەتكىلىكتى»، - دەدى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتى اگەنتتىك تىلشىسىنە بەرگەن جاۋابىندا.

ايتا كەتەيىك، استىقتىڭ ساقتالۋىن قامتاماسىز ەتۋ ءۇشىن جاڭا استىق قويمالارىن سالۋ جانە قولدانىستاعىلارىن كەڭەيتۋ ارقىلى ەليەۆاتورلىق قۋاتتى ارتتىرۋ جونىندە شارالار قابىلدانعان. وسىلايشا، 2024-2026 -جىلدارى سىيىمدىلىعى 30,2 مىڭ توننانى قۇرايتىن 5 استىق قويماسىن ىسكە قوسۋ جوسپارلانىپ وتىر.