جەڭىسىمدى وتانىم مەن وتباسىما ارنايمىن - پاراليمپياداشى ەركىن عابباسوۆ
استانا. KAZINFORM - بۇگىن قازاقستاندىقتار XVII جازعى پاراليمپيادا ويىندارىنىڭ جۇلدەگەرى ەركىن عابباسوۆتى ەلوردا اۋەجايىنان قوشەمەتپەن قارسى الدى.
R1 كلاسسىندا ۆينتوۆكامەن 10 مەترگە پارا نىسانا كوزدەۋدەن سىنعا تۇسكەن وتانداسىمىز ەل قورجىنىنا كۇمىس سىيلاعان ەدى.
التىن مەدالدى 249.4 ۇپاي جيناعان كورەيا سپورتشىسى پارك دج، ال قولا مەدال 226 ۇپاي جيناعان دانيا ەلىنىڭ سپورتشىسى ەنشىلەدى.
وليمپيادا جەڭىمپازىن قارسى الۋعا سپورتشىنىڭ جاقىندارى، دوستارى مەن جانكۇيەرلەرى جينالدى.
«قارسىلاستارىم وتە تانىمال، مەن ولارمەن قاتار ونەر كورسەتكەنىمە ماقتانامىن. قاتتى ۋايىمدادىم. پاراليمپيادانىڭ التىن جۇلدەسىن العان پاك دجينحو قاتەلەسپەسەم الەمدىك رەكوردشى، بۇعان دەيىن 3-4 رەت پاراليمپياداعا قاتىسقان. قارسىلاستارىم مىقتى بولدى»، - دەدى ەركىن عابباسوۆ ب ا ق وكىلدەرىنە سۇحبات بەرە تۇرىپ.
سونداي-اق، سپورتشى ويىن بارىسىندا جانكۇيەرلەردىڭ قولداۋىن سەزىنگەنىن ايتتى.
«مەنى انام، ايەلىم مەن بالالارىم ۇنەمى قولدايدى. ايەلىم ۇنەمى مەنىمەن بىرگە جۇرەدى، بۇل جولى دا قاسىمدا بولدى. ودان بولەك، جاقىندارىمنان، دوستارىمنان، ارىپتەستەرىم مەن سپورت قاۋىمداستىقتارىنىڭ قولداۋىن سەزىندىم. سوندىقتان دا جەڭىسىمدى وتانىم مەن وتباسىما ارنايمىن»، - دەيدى جەڭىمپاز جەرلەسىمىز.
ەسكە سالا كەتسەك، ەركىن عابباسوۆ پاراليمپيادا ويىندارىنىڭ كۇمىس جۇلدەسىن ەنشىلەگەن بولاتىن.
اۆتور
داۋلەت ىزتىلەۋ
