جەڭىسكە 80 جىل: الماتى اسپانىندا سوعىس باتىرلارىنىڭ بەينەسى كورسەتىلەدى

الماتى. قازاقپارات - 9 - مامىر كۇنى ساعات 21:00 دە اباي الاڭىندا جەڭىستىڭ 80 جىلدىعىنا وراي الماتىلىقتار مەن قالا قوناقتارىنا ەرەكشە جارىق شوۋى ۇسىنىلادى - 500 درون قاتىساتىن اۋقىمدى كورىنىس وتەدى.

الماتى اكىمدىگىنەن اتاپ وتكەندەي، كورسەتىلىمنىڭ باستى ەرەكشەلىگى - سوعىس جىلدارىندا قازاقستاندى داڭققا بولەگەن باتىرلاردىڭ بەينەسى كورسەتىلەدى.

- الماتى اسپانىندا اتى اڭىزعا اينالعان قاھارمان قىزدار مانشۇك مامەتوۆا مەن ءاليا مولداعۇلوۆا، سونداي-اق، باۋىرجان مومىش ۇلىنىڭ بەينەسى جارىق ارقىلى جاندانادى. زاماناۋي تەحنولوگيالار مەن جارىق انيماتسياسىنىڭ كومەگىمەن ولاردىڭ ەرلىگى مەن رۋحىن جەتكىزەتىن كورىنىستەر ارقىلى ەلگە تانىستىرىلادى، - دەپ حابارلادى اكىمدىكتەن.

درون- شوۋ بارىسىندا ەسكە الۋدىڭ بەلگىسى رەتىندە تىرنالار دا كورسەتىلەدى. ال شوۋدىڭ سوڭىندا قازاقتىڭ ويۋ-ورنەگى اياسىندا «جەڭىس كۇنى قۇتتى بولسىن» دەگەن جازۋ پايدا بولادى.

- بۇل زاماناۋي ۆيزۋالدى شوۋ - باتىرلارعا تاعزىم عانا ەمەس، سوعىس تۋرالى جاڭا، قولجەتىمدى، اسەرلى ءارى ەستە قالارلىق بايانداۋ ءتۇرى. ول تاريحي جادىمىزدى ساقتاۋ مەن كەلەر ۇرپاققا جەتكىزۋدىڭ ماڭىزدىلىعىن ەسكە سالادى. ءىس- شارا دەمەۋشىلەردىڭ قولداۋىمەن بارلىق قاۋىپسىزدىك تالاپ ساقتالا وتىرىپ ۇيىمداستىرىلادى، - دەپ اتاپ ءوتتى اكىمدىكتەن.

ۇيىمداستىرۋشىلار درون- شوۋدى تاماشالاۋعا ارنالعان بىرنەشە ىڭعايلى الاڭ دايىندادى. باستى ورىندار: اباي الاڭى، «قازاقستان» قوناق ءۇيىنىڭ ماڭى، Caspian University جانىنداعى ورىن جانە اباي داڭعىلى بويىنداعى اۋماقتار - نازاربايەۆ داڭعىلىنان دوستىق داڭعىلىنا دەيىن.

وسىعان بايلانىستى 9 - مامىر كۇنى ساعات 20:30 دان 21:30 عا دەيىن قالا ورتالىعىندا اۆتوكولىك قوزعالىسىنا ۋاقىتشا شەكتەۋ ەنگىزىلەدى.

اباي داڭعىلىنىڭ نازاربايەۆ داڭعىلىنان دوستىق داڭعىلىنا دەيىنگى بولىگى، سونداي-اق، دوستىق داڭعىلىنىڭ قۇرمانعازى كوشەسىنەن ساتبايەۆ كوشەسىنە دەيىنگى ارالىعىندا جول جابىلادى.
الماتى قالاسىنىڭ اكىمدىگى قالا تۇرعىندارى مەن قوناقتارىن باعىتتى الدىن الا جوسپارلاۋعا جانە ۋاقىتشا قولايسىزدىققا تۇسىنىستىكپەن قاراۋعا شاقىرادى.