جۋىنۋ بولمەسىندە جاسىرىن ۆيدەوعا تۇسىرگەن: اتىراۋدا بۇرىنعى ايەلىن بوپسالاعان ەر ادام سوتتالدى

اتىراۋ. KAZINFORM - اتىراۋدا قىلمىستىق ىستەر جونىندەگى سوت القاسى باس بوستاندىعى شەكتەلگەن ەر ادامعا قاتىستى سوت ۇكىمىن وزگەرتتى. سوتتالۋشى 1,5 جىلعا باس بوستاندىعىنان ايىرىلىپ، سوت زالىنان قاماۋعا الىندى.

اتىراۋ وبلىستىق سوتىنىڭ قىلمىستىق ىستەر جونىندەگى سوت القاسىندا بۇرىن باس بوستاندىعى شەكتەلگەن ەر ادامعا قاتىستى قىلمىستىق ءىس اپەەللياتسيالىق تارتىپپەن قارالدى.

«سوتتالۋشى مەن جابىرلەنۋشىنىڭ اراسىنداعى زاڭدى نەكە بۇزىلعان. ولاردىڭ كامەلەتكە تولماعان ورتاق نەكەدەگى 5 بالاسى اناسىنىڭ قامقورلىعىندا قالعان. نەكە بۇزىلعاننان كەيىن جۇبايى اپكەسىنىڭ ۇيىندە تۇرعان. ەر ادام سول ءۇيدىڭ اۋلاسىنا زاڭسىز كىرىپ، جۋىناتىن بولمەنىڭ تەرەزەسىنەن ولاردىڭ جالاڭاش بەينەسىن بەينەجازباعا تۇسىرگەن. كەلەسى كۇنى ول بۇرىنعى جۇبايىن نوتاريۋسقا شاقىرىپ، سول جەردە ودان ورتاق ءۇي قۇنىنىڭ ءبىر بولىگىن بەرۋ تۋرالى قولحات جازۋدى تالاپ ەتكەن. ال باس تارتقان جاعدايدا تۇسىرىلگەن بەينەجازبانى ينتەرنەت جەلىسىندە تاراتامىن دەپ قورقىتقان. جابىرلەنۋشىنى قولحات جازۋعا ماجبۇرلەپ، وزىنشە بيلىك ەتكەن»، - دەپ حابارلادى وبلىستىق سوتتىڭ باسپا ءسوز قىزمەتى.

ءبىرىنشى ساتىداعى سوت تاعايىنداعان جازا سوتتالۋشىنىڭ جەكە باسىنا، ءىستىڭ ءمان-جايلارىنا جانە جاسالعان قۇقىق بۇزۋشىلىق ارەكەتتەرىنە سايكەس كەلمەيتىنى انىقتالعان. جابىرلەنۋشىنىڭ ايتۋىنشا، سوتتالۋشى قۇقىق قورعاۋ ورگاندارىنىڭ وزىنە جانە ونىڭ بالالارىنا جاقىنداماۋ تۋرالى بۇيرىعىنا قاراماستان، ۇكىم شىعارىلعاننان كەيىن دە وعان تىنىشتىق بەرمەگەن. وزىنە قارسى زاڭسىز ارەكەتتەر جاساپ، ونى اڭدىپ جۇرگەن جانە بالاعاتتاعان.

«قازىرگى ۋاقىتتا ىشكى ىستەر ورگاندارىمەن سوتتالۋشىعا قاتىستى بالاسىن ءوزىن-ءوزى ولتىرۋگە دەيىن جەتكىزۋ بويىنشا قىلمىستىق ءىستىڭ تەرگەلىپ جاتقانى انىقتالدى. سوت باياندالعانداردى ەسكەرە وتىرىپ، ۇكىمدى وزگەرتتى. سوتتالۋشى ق ر قىلمىستىق كودەكستىڭ 389-بابىنىڭ 3-بولىگىمەن ناقتى 1,5 جىلعا باس بوستاندىعىنان ايىرىلدى. ول سوت زالىنان قاماۋعا الىندى. جابىرلەنۋشىنىڭ اپەللياتسيالىق شاعىمى قاناعاتتاندىرىلدى»، - دەپ ءمالىم ەتتى وبلىستىق سوتتىڭ باسپا ءسوز قىزمەتىنەن.

اۆتور
جولداسبەك شوپەعۇل