جىلىوي اۋدانىنداعى سۋ تاسقىنىنان زارداپ شەككەن 3271 وتباسىنا 1,2 ميلليارد تەڭگە تولەندى

اتىراۋ. KAZINFORM - اتىراۋ وبلىسىنىڭ جىلىوي اۋدانىنداعى سۋ تاسقىنىنان زارداپ شەككەن 3271 وتباسىنا 1,2 ميلليارد تەڭگە تولەندى.

اتىراۋ وبلىسىنىڭ اكىمى سەرىك شاپكەنوۆتىڭ مالىمەتىنشە، جىلىوي اۋدانىندا تۇراتىن 3398 وتباسىنان ءبىر رەتتىك مەتاريالدىق كومەك الۋعا ءوتىنىش بەرگەن.

قازىر جىلىوي اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ قىزمەتكەرلەرى سۋ تاسقىنىنان زارداپ شەككەن وتباسىلاردىڭ ءوتىنىشىن تاۋلىك بويى وڭدەيدى.

«جىلىوي اۋدانىنداعى سۋ تاسقىنىنان زارداپ شەككەن وتباسىلارعا ءبىر جولعى الەۋمەتتىك تولەم بەرۋ تۋرالى شەشىم قابىلداندى. بۇل تولەم 100 ايلىق ەسەپتىك كورسەتكىش مولشەرىندە ۇسىنىلىپ وتىر. وسى كەزگە دەيىن اتالعان اۋداندا تۇراتىن 3271 وتباسىنا جالپى سوماسى 1 ميلليارد 267 ميلليون 653 مىڭ 200 تەڭگەنىڭ 100 ا ە ك مولشەرىندە ءبىرجولعى ماتەريالدىق كومەك تولەندى. جەرگىلىكتى تۇرعىنداردىڭ ءوتىنىشىن قابىلداۋ جالعاسىپ جاتىر»، - دەدى سەرىك شاپكەنوۆ.

ەسكە سالا كەتەلىك، بۇعان دەيىن جىلىوي اۋدانىندا 1866 وتباسى ءبىر رەتتىك الەۋمەتتىك كومەك قارجىسىن العانىن حابارلاعان بولاتىنبىز.

كەيىن اتىراۋداعى قۇلسارى قالاسىنان 887 مىڭنان استام تەكشە مەتر سۋ سورىلعانىن جازعان ەدىك.

سونداي-اق، اتىراۋ وبلىسىندا سۋ تاسقىنىنان زارداپ شەككەندەردەن 226 ءوتىنىش تۇسكەن.