جىلىتۋ ماۋسىمىنا دايىندىق: بەكتەنوۆ وبلىس باسشىلارىنا 5 ناقتى تاپسىرما بەردى
استانا. KAZINFORM - پرەمەر-مينيستر ولجاس بەكتەنوۆ الداعى ءۇش ايدا وبلىس اكىمدەرى اتقارۋى ءتيىس ءبىرقاتار مىندەتتەردى اتاپ ءوتتى.
- جىلىتۋ ماۋسىمىنا دايىندىق - اكىمدىكتەردىڭ الداعى ءۇش اي ىشىندەگى نەگىزگى مىندەتى. وسىعان بايلانىستى مىناداي تاپسىرمالار بەرەمىن، - دەدى ولجاس بەكتەنوۆ.
ۇكىمەت باسشىسى وبلىس باسشىلارىنا مىنانداي 5 ناقتى تاپسىرما بەردى:
1. ءوڭىر اكىمدىكتەرى بارلىق كونكۋرستىق راسىمدەردى ەكى اپتا مەرزىمدە اياقتاپ، جوندەۋ جۇمىستارىنا ناقتى كىرىسۋى كەرەك. باسى ارتىق بيۋروكراتياعا جول بەرۋگە بولمايدى.
بيىل ىسكە قوسۋ جوسپارلانىپ وتىرعان جاڭا جىلۋ نىساندارى بويىنشا بارلىق جۇمىستاردى تامىز ايىنان كەشىكتىرمەي اياقتاۋ قاجەت.
اكىمدەرگە جىلۋ نىساندارىنا اپتا سايىن بارىپ، جاعدايدى جەكە باقىلاۋعا الۋدى جانە بارلىق تۋىنداعان تاۋەكەلدەر بويىنشا شۇعىل ارەكەت ەتۋدى تاپسىرامىن.
2. ەنەرگەتيكا جانە ونەركاسىپ مينيسترلىكتەرى، ءوڭىر اكىمدىكتەرى 10-ماۋسىمعا دەيىن جىلىتۋ ماۋسىمىنا دايىندىق جوسپارلارىن ناقتىلاسىن.
سولتۇستىك، ورتالىق جانە شىعىس وڭىرلەردە بارلىق ينجەنەرلىك ينفراقۇرىلىم مەن تۇرعىن ءۇي- كوممۋنالدىق شارۋاشىلىق وبەكتىلەرى 15- قىركۇيەككە دەيىن، ال قالعان وڭىرلەردە - 15-قازانعا دەيىن تولىقتاي ءازىر بولۋعا ءتيىس.
3. «KEGOC» كومپانياسى ەنەرگەتيكا مينيسترلىگىمەن بىرلەسىپ، 15-ماۋسىمعا دەيىن الداعى جىلىتۋ ماۋسىمىندا ۇلتتىق ماڭىزى بار ستانتسيالارعا ارنالعان جابدىقتاردىڭ جۇمىس رەجيمدەرىن بەكىتۋى كەرەك.
جوندەۋ مەرزىمدەرىن اۋىستىرۋعا نەمەسە جۇمىس كولەمىن ازايتۋعا جول بەرىلمەيدى. ءاربىر فاكت بويىنشا مەنشىك يەلەرىنە، سول سياقتى باسقارۋشى كومپانيالارعا قاتىستى شارالار قابىلداناتىن بولادى.
4. ەنەرگەتيكا مينيسترلىگى كولىك مينيسترلىگىمەن جانە اكىمدىكتەرمەن بىرلەسىپ، 1- قىركۇيەككە دەيىن جىلۋ كوزدەرى مەن تۇيىقتاردا وتىن قورىن الدىن الا جيناقتاۋدى قامتاماسىز ەتسىن.
5. ۇكىمەت اپپاراتى وڭىرلەردىڭ جىلىتۋ ماۋسىمىنا ازىرلىك بارىسىنا تۇراقتى نەگىزدە باقىلاۋ جاساپ، ماعان ءتيىستى اقپارات بەرىپ وتىرسىن.
تاپسىرمانى باقىلاۋ مەن ۇيلەستىرۋ رومان سكليارعا جۇكتەلدى.
ايتا كەتەلىك ونەركاسىپ جانە قۇرىلىس مينيسترلىگى الداعى جىلۋ ماۋسىمىنا دايىندالۋ ماقساتىندا ءىس- شارالار جوسپارىن ازىرلەگەن ەدى.
