جىل باسىنان بەرى قىتايدان قازاقستانعا 10,2 ميلليارد تەكشە مەتر سۋ كەلدى
استانا. KAZINFORM - بيىل العاشقى التى ايدا قازاقستانعا قىتايدان ەرتىس وزەنى ارقىلى 4,6 ميلليارد تەكشە مەتر جانە ىلە وزەنى ارقىلى 5,6 ميلليارد تەكشە مەتر سۋ كەلدى. بۇل تۋرالى سۋ رەسۋرستارى جانە يرريگاتسيا مينيسترلىگى ءمالىم ەتتى.
ىلە وزەنى ارقىلى كەلگەن سۋ ەكىنشى جىل قاتارىنان الماتى وبلىسىنداعى قاپشاعاي سۋ قويماسىن %100 تولتىرۋعا مۇمكىندىك بەردى.
بۇل ءوز كەزەگىندە بالقاش كولىنە 8,52 ميلليارد تەكشە مەتر سۋ جىبەرۋگە مۇمكىندىك بەردى. ناتيجەسىندە 2025 -جىلدىڭ باسىنان بەرى بالقاش دەڭگەيى ورتا ەسەپپەن 32 س م-گە، ياعني بالتىق جۇيەسى بويىنشا 341,55 مەتردەن 341,87 مەترگە دەيىن ءوستى.
- ق ح ر-مەن ىنتىماقتاستىق تەك ترانسشەكارالىق وزەندەردى عانا قامتىمايدى. بيىل ناۋرىز ايىندا قازاقستان مەن قىتايدىڭ سۋ ۆەدومستۆولارى العاش رەت ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويدى. قۇجاتتا رەسۋرستاردى ءتيىمدى ءارى تۇراقتى پايدالانۋدى قامتاماسىز ەتۋ، زاماناۋي تەحنولوگيالاردى ەنگىزۋ، بالامالى سۋ كوزدەرىن ءبولۋ جانە يگەرۋ، سونداي-اق تاجىريبە الماسۋ مەن بىرلەسىپ كادرلار دايارلاۋ جونىندەگى ىنتىماقتاستىقتى نىعايتۋ كوزدەلگەن، - دەدى سۋ رەسۋرستارى جانە يرريگاتسيا مينيسترلىگى قىتاي جانە رەسەيمەن سۋ سالاسىنداعى ىنتىماقتاستىعى باسقارماسى باسشىسى ناعيما ءاجىعۇلوۆا.
