جىل باسىنان بەرى جۇمىسپەن قامتۋعا جاردەمدەسۋ شارالارىمەن 627 مىڭ ادام قامتىلدى

استانا. قازاقپارات - 2024 -جىلعى 1-جەلتوقسانداعى جاعداي بويىنشا جۇمىسپەن قامتۋعا جاردەمدەسۋ شارالارىنا 627,6 مىڭ قازاقستاندىق قاتىستى. 496,2 مىڭ ادام جۇمىسپەن قامتىلدى، ونىڭ 311,1 مىڭى تۇراقتى جۇمىسقا ورنالاستى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، سۋبسيديالاناتىن جۇمىس ورىندارىنا 185,1 مىڭ ادام ورنالاستىرىلعان. ونىڭ ىشىندە الەۋمەتتىك جۇمىس ورىندارىندا 15,5 مىڭ ادام، جاستار پراكتيكاسىندا 32,2 مىڭ ادام، قوعامدىق جۇمىستاردا 108,4 مىڭ ادام، «العاشقى جۇمىس ورنى» جوباسى اياسىندا 9,5 مىڭ ادام، «ۇرپاقتار كەلىسىمشارتى» جوباسى اياسىندا 417 ادام، «كۇمىس جاس» جوباسى اياسىندا 19 مىڭ ادام جۇمىسپەن قامتىلدى.

ەڭبەك نارىعىندا سۇرانىسقا يە داعدىلار بويىنشا ونلاين وقىتۋمەن 55,2 مىڭ جۇمىسسىز قامتىلدى، ونىڭ ىشىندە 50,1 مىڭى وقۋدى اياقتادى.

سونداي-اق «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋمەن 57,5 مىڭ ادام قامتىلدى، ونىڭ ىشىندە 36,6 مىڭ ادام وقۋدى اياقتاپ، سەرتيفيكاتتار الدى.

قىزمەت سالاسىن تاڭداۋ ماقساتىندا 202,4 مىڭ ادام الەۋمەتتىك كاسىپتىك باعدارلاۋدان ءوتتى.

بۇدان باسقا، جاڭا بيزنەس- باستامالاردى ىسكە اسىرۋ ءۇشىن اعىمداعى جىلدىڭ باسىنان حالىقتىڭ الەۋمەتتىك وسال ساناتتارىنا 400 ا ە ك دەيىنگى (1476800 تەڭگە) مولشەردە 8941 گرانت بەرىلدى.

ابىلايحان جۇماشەۆ