جىل باسىنان بەرى جالعان اقپارات جاريالاۋ بويىنشا 47 قىلمىستىق ءىس تىركەلدى
استانا. KAZINFORM - جالعان اقپارات تاراتقانى ءۇشىن جەتى جىلعا دەيىن باس بوستاندىعىنان ايىرۋ جازاسى كوزدەلگەن.
سوڭعى ۋاقىتتا الەۋمەتتىك جەلىلەردە، مەسسەندجەرلەردە جانە باسقا دا ونلاين-پلاتفورمالاردا ادەيى جالعان اقپارات تاراتىپ، ارانداتۋشىلىق تۋدىرۋ جاعدايلارى جيىلەپ كەتتى. مۇنداي ارەكەتتەر قوعامدىق احۋالدى تۇراقسىزداندىرىپ، سەنىمگە سەلكەۋ ءتۇسىرىپ، جانجالدارعا سەبەپ بولىپ وتىر.
فەيكتەردى تاراتۋ - قىلمىستىق جاۋاپكەرشىلىككە اكەلەتىن ءىس-ارەكەت. جالعان اقپارات تاراتقانى ءۇشىن جەتى جىلعا دەيىن باس بوستاندىعىنان ايىرۋ جازاسى كوزدەلگەن.
تەك جارتى جىلدىڭ ىشىندە جالعان اقپارات جاريالاۋ بويىنشا 47 قىلمىستىق ءىس تىركەلدى.
مىسالى، تۇركىستان وبلىسىندا ءبىر ازامات الەۋمەتتىك جەلىلەردە شەتەلدىك ينۆەستورلارعا جەر بەرىلدى دەگەن جالعان اقپارات تاراتقان. سوت ۇكىمىمەن ول كىنالى دەپ تانىلىپ، جاۋاپقا تارتىلدى.
ۇلتارالىق، ءدىني نەمەسە الەۋمەتتىك الاۋىزدىقتى قوزدىرۋ فاكتىلەرى دە ەرەكشە الاڭداۋشىلىق تۋدىرىپ وتىر. بۇل - اۋىر قىلمىس، ول ءۇشىن زاڭنامادا 20 جىلعا دەيىن باس بوستاندىعىنان ايىرۋ جازاسى قاراستىرىلعان.
2025 -جىلدىڭ العاشقى جارتىجىلدىعىندا وسىنداي فاكتىلەر بويىنشا 64 قىلمىستىق ءىس قوزعالدى. 15 ادام سوتتالدى، ولاردىڭ توعىزىنا باس بوستاندىعىنان ايىرۋ جازاسى قاراستىرىلدى.
اباي وبلىسىنىڭ تۇرعىنى TikTok-تا ۇلتتىق بەلگىلەر بويىنشا بالاعات سوزدەر ايتىلعان ۆيدەو تاراتقان؛ قىزىلوردا وبلىسىنىڭ تۇرعىنى كوپشىلىك الدىندا ءدىني الاۋىزدىقتى قوزدىرعان.
ولاردىڭ بارلىعى ۇستالىپ، سوت ۇكىمى بويىنشا جازالاندى. جالعان اقپاراتتى ينتەرنەتتە تاراتقانى ءۇشىن قىلمىستىق جاۋاپكەرشىلىكپەن قاتار اكىمشىلىك جاۋاپكەرشىلىك تە بار. ا ق ب ت ك-نىڭ 456-2-بابى بويىنشا التى ايدا 38 ادام اكىمشىلىك جاۋاپكەرشىلىككە تارتىلدى.
اتىراۋ وبلىسىندا ازامات دامبا قيرادى دەگەن جالعان ۆيدەونى جاريالاعان؛ پەتروپاۆلدا بەلسەندى تۇرمەدەگى سوتتالعاندار تۋرالى جالعان اقپارات تاراتقان. ولاردىڭ بارلىعى بىرنەشە تاۋلىككە اكىمشىلىك قاماۋعا الىندى. ءى ءى م زاڭدى بۇزاتىن كەز كەلگەن جاريالانىم قۇقىقتىق جاۋاپكەرشىلىككە اكەلەتىنىن ەسكەرتەدى.
- بارشا ازاماتتاردى زاڭ تالاپتارىن ساقتاۋعا جانە اقپارات تاراتۋدا مۇقيات بولۋعا شاقىرامىز. ءاربىر حابارلاما شىنايى، ارازدىققا شاقىرمايتىن جانە قوعامدىق ءتارتىپتى بۇزبايتىن بولۋى ءتيىس. قوعامداعى بەيبىتشىلىك، تۇراقتىلىق پەن سەنىمدى تەك ورتاق قۇقىقتىق مادەنيەت جانە ءبىر-بىرىمىزگە دەگەن قۇرمەتتى ساقتاۋ ارقىلى قامتاماسىز ەتە الامىز، - دەپ اتاپ ءوتتى ۆەدومستۆودا.
