جولدار ءماجبۇرلى تۇردە بۇزىلىپ جاتىر
استانا. KAZINFORM - ەلىمىز بويىنشا ەرىگەن قار سۋىن وتكىزۋ ءۇشىن جالپى ۇزىندىعى 70 مەتر بولاتىن 8 ۋچاسكەدە جول توسەمى ءماجبۇرلى تۇردە بۇزىلعان.
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ق ر كولىك مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى عالىمجان وتەنبايەۆ ايتتى.
«جەرگىلىكتى جولدار بويىنشا 12 وبلىستا سۋ باسۋدىڭ 333 جاعدايى تىركەلدى. جالپى ۇزىندىعى 1 238 شاقىرىمدى قۇرايتىن 90 ۋچاسكەدە اۆتوكولىك قۇرالدارىنىڭ قوزعالىسىنا شەكتەۋ قويىلدى»، - دەدى ول.
ماسەلەن، اقتوبە وبلىسىندا قاندىاعاش - ەمبى قالالارى ارالىعىندا قاندىاعاش، ەمبى، شالقار، ىرعىز رەسپۋبليكالىق ماڭىزى بار جول ۋچاسكەسىندە قوزعالىس شەكتەلگەن. اتىراۋ وبلىسىندا مۇقىر-قۇلسارى اۆتوموبيل جولىندا دوسسور مەن قۇلسارى قالالارى اراسىندا جول جابىق.
قوستاناي وبلىسىندا ق ر مەن ر ف اراسىنداعى بەيتاراپ بەلدەۋدە ورنالاسقان جەلقۋار وزەنىندەگى سۋدىڭ كۇرت كەلۋىنە بايلانىستى مارينوۆكا اۋىلىنا كىرەبەرىس اۆتوموبيل جولىندا شەكتەۋ قويىلدى.
س ق و ەسىل وزەنىنىڭ سۋ دەڭگەيىنىڭ كوتەرىلۋىنە جانە اۆتوموبيل جولدارىن ەرىگەن سۋدىڭ باسىپ كەتۋىنە بايلانىستى رەسپۋبليكالىق ماڭىزى بار 6 ۋچاسكەسىندە جول قوزعالىسى شەكتەلگەن.
