جول ەرەجەسىن ءجيى بۇزاتىندار ايىپپۇلدى جوعارى سومادا تولەۋى كەرەك - سەناتور

استانا. KAZINFORM - سەنات دەپۋتاتى مارات قوجايەۆ ەلىمىزدە جول ەرەجەسىن كۇن سايىن بۇزاتىن جۇزدەگەن ادام بار ەكەنىن ايتتى.

- جۇيەلى تۇردە جول ەرەجەسىن ءجيى بۇزاتىندار ءۇشىن، ياعني (ءبىر جىلدا) قاساقانا ءبىر ساناتتاعى ەرەجەنى 10 رەت قاتارىنان بۇزسا، وندا 11-رەت قايتالاعان جاعدايدا ايىپپۇل بويىنشا 50 پايىزدىق جەڭىلدىكتى وسى ادامدارعا قولدانباۋ كەرەك. بۇل ۇسىنىس ەرەجەنى ءجيى بۇزبايتىن ادامدارعا قاتىستى ەمەس، ولارعا پايىزدىق جەڭىلدىك ساقتالۋى قاجەت، - دەدى مارات قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، جىل ىشىندە 195 مىڭ جۇرگىزۋشى 10 نان 50 گە دەيىن جول قوزعالىسى ەرەجەسىن بۇزعان. ال 50 دەن 100 گە دەيىن ەرەجە بۇزعان بىرنەشە مىڭ جۇرگىزۋشى بار. سونداي-اق ءبىر جىلدا 300 جانە ودان دا كوپ جول قوزعالىسى ەرەجەسىن بۇزعان جۇزدەگەن جۇرگىزۋشى انىقتالعان.

- كۇن سايىن ادەيى جول ەرەجەسىن بۇزاتىن وسى جۇزدەگەن ادام ايىپپۇلدى تولەپ، ارى قاراي جۇرە بەرەدى. وسى ادامدار ءۇشىن 50 پايىزدىق جەڭىلدىكتى الىپ تاستاۋدى ۇسىنىپ وتىرمىن، - دەدى سەناتور.

ەسكە سالساق، بيىل اقپان ايىندا سەناتور مارات قوجايەۆ جول ەرەجەسىن ءجيى بۇزاتىندارعا ايىپپۇل تولەۋدە %50 جەڭىلدىكتى الىپ تاستاۋدى ۇسىنعان ەدى.

دەپۋتات الدىن الۋ جۇمىسىن كۇشەيتۋ ءۇشىن مۇنداي جۇرگىزۋشىلەردى سىناقتى قايتا تاپسىرۋعا جىبەرۋدى، سونداي-اق قاجەت بولعان جاعدايدا ولاردى جۇرگىزۋشى كۋالىگىنەن ايىرۋ كەرەك ەكەنىن ايتتى.

اتاپ ايتقاندا، ەلىمىزدە جول ەرەجەسىن بۇزعاندار ايىپپۇل سالىنعان كۇننەن باستاپ ءبىر اپتانىڭ ىشىندە تولەسە، وندا وسى ايىپپۇلدىڭ جارتىسىن عانا وتەۋ مۇمكىندىگى جاسالعان.