جول قۇرىلىسىنا قاراجات بولمەيتىن وبلىستار بار - مارات قارابايەۆ

كولىك ءمينيسترى مارات قارابايەۆ وڭىرلىك جولداردىڭ جاي-كۇيى مەن جەرگىلىكتى اكىمدىكتەردىڭ قۇلىقسىزدىعىن سىنعا الدى، دەپ حابارلايدى Kazinform.

«بۇگىندە جولداردىڭ ساپاسى بويىنشا كوپ سىن ايتىلۋدا. ولاردىڭ باسىم بولىگى جەرگىلىكتى جەلىگە قاتىستى. بيىل 4200 شاقىرىم جەرگىلىكتى جولدار جوندەۋمەن قامتىلعان، ونىڭ 3600 شاقىرىمى جىل سوڭىنا دەيىن اياقتالادى. بۇل جۇمىستارعا بيۋدجەتتەن 384 ميلليارد تەڭگە كوزدەلگەن، ونىڭ تەك 81 ميلليارد تەڭگەسى عانا نەمەسە %21 جەرگىلىكتى بيۋدجەتتەن ءبولىندى»، - دەدى مارات قارابايەۆ ۇكىمەتتىڭ بۇگىنگى وتىرىسىندا.

بۇل رەتتە كەيبىر ايماقتاردا، ونىڭ ىشىندە جولداردىڭ جاي-كۇيى ەڭ تومەن وڭىرلەردە جەرگىلىكتى بيۋدجەتتەن مۇلدەم قاراجات قارالماعان.

«اتاپ ايتساق، ولار - باتىس قازاقستان، قوستاناي، اباي، شىعىس قازاقستان، ماڭعىستاۋ جانە اتىراۋ وبلىستارى. وسى ورايدا، ءتيىستى اكىمدىكتەر جولداردىڭ نورماتيۆتىك جاعدايىن كوتەرۋ ءۇشىن، جەرگىلىكتى بيۋدجەتتەن قوسىمشا قارجىلاندىرۋدى قاراستىرۋى قاجەت. بولىنگەن قاراجاتتى ءتيىمدى پايدالانۋ ماقساتىندا «ۇلتتىق ساپا ورتالىعى» جاساعان جۇمىستاردى قاداعالاۋ اسا ماڭىزدى. ساراپتاما جۇرگىزۋدىڭ تومەن دەڭگەيى قاراعاندى (%51)، اقمولا (%73) جانە قوستاناي (%79) وبلىستارىندا بايقالۋدا»، - دەدى م. قارابايەۆ.

سونىمەن قاتار نىساندارعا ايىنا ەڭ كەمى 4 رەت تەكسەرۋ قاجەتتىگى بولا تۇرا، كەي وڭىرلەردە جىل بويى ءبىر- اق رەت تەكسەرۋ جۇرگىزىلگەن. ول جامبىل، تۇركىستان جانە قىزىلوردا وبلىستارىندا ورىن الىپ وتىر.

«ۇلتتىق ساپا ورتالىعى» قۇرىلىس ماتەريالدارىنىڭ 27 مىڭ سىناماسىن العان. ونىڭ 2900-ىندە سايكەسسىزدىكتەر انىقتالىپ، ولاردى تۇزەتۋ بويىنشا ءتيىستى شارالار قابىلداندى. مەردىگەرلەر ءوز قاراجاتى ەسەبىنەن 2 ميلليارد تەڭگەگە جۇمىستاردى قايتا جۇرگىزگەن.

ايتا كەتەيىك، بيىلعى 11 ايدىڭ قورىتىندىسى بويىنشا رەسپۋبليكاداعى اقىلى جولداردان 26 ميلليارد 500 ميلليون تەڭگە قاراجات ءتۇستى. سوڭعى ۋاقىتتا ترانزيتتىك اعىننىڭ ارتۋىنا بايلانىستى، جوندەلگەن جولداردى نورماتيۆتىك جاعدايدا ساقتاۋ ءۇشىن جول اقىسىن قايتا قاراۋ جۇمىستارى جۇرگىزىلۋدە.

سونداي-اق حالىقتىڭ شاعىمدارىن ەسكەرە وتىرىپ، وسى جىلى بارلىق كۇش قۇرىلىسى ۇزاققا سوزىلعان 6 نەگىزگى جوباعا باعىتتالدى. بۇل تالدىقورعان - وسكەمەن، قاراعاندى - الماتى، مەركە - بۋرىلبايتال، اقتوبە - قاندىاعاش جانە اتىراۋ - استراحان جولدارى.