جوڭعار الاتاۋى ۇلتتىق پاركىندە ءىلبىس فوتوتۇزاققا ءتۇسىپ قالدى
استانا. KAZINFORM - جوڭعار الاتاۋى مەملەكەتتىك ۇلتتىق تابيعي پاركىنىڭ اۋماعىندا سيرەك كەزدەسەتىن ءارى جاسىرىن ءومىر سالتىن ۇستاناتىن جىرتقىش - قار بارىسى (ءىلبىس) فوتوتۇزاققا ءتۇسىرىلدى. بۇل تۋرالى ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى حابارلادى.
- بۇل بىرەگەي كادرلار جوسپارلى ەكولوگيالىق مونيتورينگ اياسىندا الىنعان. قار بارىسى قازاقستان رەسپۋبليكاسىنىڭ قىزىل كىتابىنا ەنگىزىلگەن جانە جويىلىپ بارا جاتقان تۇرلەر قاتارىنا جاتادى. ونىڭ تابيعي ورتادا كورىنۋى ەكوجۇيەنىڭ تۇراقتى جاعدايىن جانە جۇرگىزىلىپ جاتقان تابيعاتتى قورعاۋ شارالارىنىڭ تيىمدىلىگىن كورسەتەدى، - دەپ جازدى كوميتەت ماماندارى.
ەسكە سالا كەتەيىك، بۇعان دەيىن «كولساي كولدەرى» مەملەكەتتىك ۇلتتىق تابيعي پاركى اۋماعىندا جابايى جانۋارلاردى باقىلاۋ ماقساتىندا ورناتىلعان بەينەتۇزاقتاردىڭ بىرىنە قر قىزىل كىتابىنا ەنگىزىلگەن قار بارىسى تاعى دا بايقالعانىن جازعان ەدىك.
