جەتىسۋ وبلىسىنداعى ايەلدىڭ ولىمىنە قاتىستى ءىس ەرەكشە باقىلاۋعا الىندى

تالدىقورعان. KAZINFORM - الەۋمەتتىك جەلىلەردە جەتىسۋ وبلىسىنىڭ اقسۋ اۋدانىنا قاراستى بالاساز اۋىلىندا ورىن العان اۋىر قىلمىس تۋرالى اقپارات تارادى.

وندا 32 جاستاعى ايزات جۋمانوۆانىڭ ولىمىنە قاتىستى جاعداي باياندالعان. وسى جاعدايعا بايلانىستى Kazinform ءتىلشىسى وقيعانىڭ ءمان-جايىن انىقتاۋعا تىرىستى.

پوليتسيانىڭ مالىمەتىنشە، 2025-جىلعى 22-ماۋسىم كۇنى ساعات 02:30 شاماسىندا اۋىر حالدەگى ايزات جۋمانوۆا وبلىستىق اۋرۋحاناعا جەتكىزىلگەن. دارىگەرلەر كەلگەننەن كەيىن جارتى ساعات ىشىندە ونىڭ قايتىس بولعانىن تىركەگەن.

قاساقانا اۋىر دەنە جاراقاتىن سالۋ فاكتىسى بويىنشا، جابىرلەنۋشىنىڭ قايتىس بولۋىنا اكەپ سوققان قىلمىسقا قاتىستى پوليتسيا تاراپىنان سوتقا دەيىنگى تەرگەپ-تەكسەرۋ امالدارى باستالدى.

- اتالعان قىلمىستىق ءىس جەتىسۋ وبلىسى پوليتسيا دەپارتامەنتى باسشىلىعىنىڭ ەرەكشە باقىلاۋىنا الىندى. قازىرگى ۋاقىتتا كۇدىكتى رەتىندە جابىرلەنۋشىنىڭ جۇبايى ۇستالىپ، ۋاقىتشا ۇستاۋ يزولياتورىنا قامالدى، - دەپ ناقتىلادى ۆەدومستۆودان.

پوليتسيا وكىلدەرىنىڭ ايتۋىنشا، تەرگەۋ اياسىندا بارلىق قاجەتتى جەدەل-تەرگەۋ شاراسى جۇرگىزىلىپ جاتىر. سوت-مەديتسينالىق ساراپتامالار تاعايىندالىپ، ىسكە قاتىسى بار تۇلعالاردىڭ بارلىق ءۋاجى مەن دالەلدەرى مۇقيات تەكسەرىلىپ جاتىر.

- تەرگەۋ پروتسەسى زاڭ تالاپتارىنا ساي ورىندالۋدا. قىلمىستىق ءىس بويىنشا وبەكتيۆتى جانە جان-جاقتى شەشىم قابىلدانۋى ءۇشىن بارلىق دالەل تولىق كولەمدە قارالادى. قىلمىسقا كىنالى تۇلعالار زاڭ اياسىندا جاۋاپقا تارتىلادى، - دەدى پوليتسيا دەپارتامەنتىنەن.

ايتا كەتەيىك، مارقۇمنىڭ تۋىستارى بۇل ءىستى اسا قاتىگەزدىكپەن جاسالعان كىسى ءولتىرۋ رەتىندە قايتا سارالاۋدى تالاپ قويىپ وتىر. ولار ايزات جۋمانوۆا اۋىر ازاپتاۋعا ۇشىراپ، قاتىگەزدىكپەن ولتىرىلگەنىن العا تارتادى. قازا تاپقان ايەلدىڭ ارتىندا ەكى جاسار قىزى قالعان. جانۇيا مۇشەلەرىنىڭ ايتۋىنشا، وقيعا ءسابيدىڭ كوز الدىندا بولعان.

ءىس بويىنشا وزگە اقپارات تەرگەۋ مۇددەسىنە ساي جاريا ەتىلمەيدى.

بۇعان دەيىن، جەتىسۋ وبلىسىندا كۇيەۋى ايەلىن ءولتىردى دەگەن كۇدىككە ىلىنگەنىن جازعانبىز.