جەتىسۋ وبلىسىندا وتباسى شىرقىن بۇزعان 120 ادام قاماۋعا الىندى

جەتىسۋ وبلىسىندا تۇرمىستىق زورلىق-زومبىلىق وقيعاسى كوبەيىپ وتىر. بىلتىر 10 ايدا مىڭنان استام دەرەك تىركەلسە، پوليتسيا بيىلعى 4 اي ىشىندە زورلىق-زومبىلىق بويىنشا 841 ءىس قوزعاعان، دەپ حابارلايدى Kazinform.

قازىر تالدىقورعانداعى ۋاقىتشا ۇستاۋ مەكەمەسىندە وتباسىنىڭ شىرقىن بۇزعان 120 ادام ۇستالىپ، قاماۋدا وتىر. پوليتسيا وكىلدەرى قۇقىقبۇزۋ دەرەگىنىڭ كوبەيۋىنە تۇرمىستىق زورلىق-زومبىلىققا قاتىستى جازانىڭ قاتاڭداتىلۋى سەبەپ بولعانىن ايتادى. ءتارتىپ ساقشىلارى تەك جازالاۋ ىسىنەن بولەك، الدىن الۋ مەن تاربيلەۋگە دە كوڭىل بولۋدە.

وڭىردە «زورلىق-زومبىلىقسىز 16 كۇن» اكسياسى ءوتىپ جاتىر. ءىس-شارا اياسىندا اكىمشىلىك جازاسىن وتەپ جاتقان ادامدارمەن ارنايى كەزدەسۋ ۇيىمداستىرىلۋدا. قوعامدىق ۇيىم وكىلدەرى، انالار كەڭەسىنىڭ جەتەكشىلەرى مەن تەولوگ، پسيحولوگتار ۋاقىتشا قامالعان ازاماتتارمەن كەزدەسىپ، سۇحباتتاسىپ، وتباسىنداعى ۇرىس-كەرىستىڭ سەبەپ-سالدارىن انىقتاپ جاتىر. ماماندار وتباسىلىق جانجالدىڭ شىعۋى مەن ايەلگە الىمجەتتىك كورسەتۋدىڭ باستى سەبەبى الكوگولدىك ىشىمدىكتى ءجيى قولدانعاندىقتان ەكەنىن ايتادى.

- قۇقىق قورعاۋشىلار مەن بىرگە پسيحولوگ، تەولوگ ماماندار وتباسىلىق زورلىق-زومبىلىقتىڭ الدىن الۋعا جۇمىلۋدا. ماماندار جازاسىن وتەپ جاتقان ازاماتتارمەن پىكىر الماسىپ، جانجالعا جول بەرمەۋدىڭ، قىلمىستىڭ الدىن الۋدىڭ جولدارىن قاراستىرادى. از دا بولسا ناتيجەسى بار. تۇرمىستىق زورلىق-زومبىلىققا قاتىستى زاڭ كۇشەيتىلگەنگە دەيىن ەرلى-زايىپتىلار ءبىر-بىرىمەن تاتۋلاسىپ، ەكىنشى تاراپ كەشىرىم بەرىپ، كوپ جاعدايدا ازاماتتار قاماۋعا الۋ جازاسىنان قۇتىلىپ كەتەتىن. قايتادان ءدال سونداي قۇقىقبۇزۋشىلىق جاساۋعا باراتىن. ال قازىر جازا قاتاڭداتىلدى. سوت جانجال شىعارعان ادامعا بىردەن ۇكىم شىعارىپ، قاماۋعا الادى، - دەيدى جەتىسۋ وبلىسى جەرگىلىكتى پوليتسيا باسقارماسىنىڭ باسشىسى قايسار مۇحمەتوۆ.