جەتىسۋ وبلىسىندا نوسەر جاۋىن سالدارىنان ۇيلەردىڭ اۋلاسىن سۋ باستى

تالدىقورعان. قازاقپارات - 3-تامىز كۇنى جەتىسۋ وبلىسى كەربۇلاق اۋدانىنا قاراستى سارىوزەك اۋىلىندا جاۋعان قاتتى نوسەر جاۋىن سالدارىنان ونداعان اۋلا سۋ استىندا قالدى

وقيعا ورنىنان تۇسىرىلگەن بەينەجازبالار الەۋمەتتىك جەلىلەردە جاريالاندى.

وبلىستىق توتەنشە جاعدايلار دەپارتامەنتىنىڭ مالىمەتىنشە، جاۋىن- شاشىننىڭ كوپ مولشەرى ساي-سالالار مەن بەتكەيلەر ارقىلى اعىپ كەلىپ، اۋىلدىڭ بىرنەشە كوشەسىن سۋ باستى.

ەڭ كوپ زارداپ شەككەن قۇلجاباي بي كوشەسىندە جاڭبىر سۋىن اعىزاتىن جۇيە جاۋىن كولەمىن كوتەرە الماي، سۋ جولعا جايىلىپ كەتكەن. سونىمەن قاتار ءۋاليحانوۆ، مولداعۇلوۆا جانە قايسەنوۆ كوشەلەرىندە دە سۋ باسۋ جاعدايلارى تىركەلدى. بارلىعى 48 اۋلاعا سۋ كىرىپ، سونىڭ ىشىندە 8 تۇرعىن ءۇيدىڭ ىشىنە دەيىن جەتكەن.

ۆەدومستۆو وكىلدەرى بۇل جاعدايدىڭ نەگىزگى سەبەبى ۇيلەردىڭ ىرگەتاسىنىڭ تومەن ورنالاسۋى ەكەنىن اتاپ ءوتتى.

ساعات 22:10-دا سۋ سورۋ جۇمىستارى تولىق اياقتالدى. قازا تاپقاندار مەن زارداپ شەككەندەر جوق.

كولىك قوزعالىسى شەكتەلمەگەن.

وقيعا ورنىنا توتەنشە جاعدايلار دەپارتامەنتىنىڭ جانە جەرگىلىكتى اتقارۋشى ورگانداردىڭ كۇشتەرى جەدەل تۇردە جۇمىلدىرىلدى. قازىرگى ۋاقىتتا جاعداي تولىق باقىلاۋعا الىنعان.

اۆتور

تاستان تويانوۆ