جەتىسۋ وبلىسىندا 2855 ادام «سالاماتتى قازاقستان» پويىزى دارىگەرلەرىنەن مەديتسينالىق كومەك الدى

تالدىقورعان. KAZINFORM - «سالاماتتى قازاقستان» مەديتسينالىق پويىزى شالعاي اۋداندارداعى تۇرعىندارعا ساپالى مەديتسينالىق كومەكتىڭ قولجەتىمدىلىگىن قامتاماسىز ەتۋ ماقساتىندا جۇمىسىن جالعاستىرىپ جاتىر. بۇل تۋرالى دەنساۋلىق ساقتاۋ مينيسترلىگىنىڭ باسپا ءسوز قىزمەتى حابارلادى.

مامانداندىرىلعان دارىگەرلەر توبى جايپاق، دوستىق جانە بەسكول ستانسيالارىندا قابىلداۋ جۇرگىزىپ، تۇرعىندارعا مەديتسينالىق كومەك كورسەتتى.

ساپار بارىسىندا تۇرعىندارعا پروفيلاكتيكالىق تەكسەرۋلەر، بەيىندى مامانداردىڭ كەڭەستەرى، باستاپقى دياگنوستيكا جانە العاشقى مەديتسينالىق كومەك كورسەتىلدى.

پويىز جۇمىسى بارىسىندا جالپى 2855 ادام، ونىڭ ىشىندە 1241 بالا تەكسەرۋدەن ءوتتى.

حالىققا تەراپەۆت، پەدياتر، وفتالمولوگ، كارديولوگ، ماممولوگ جانە باسقا دا ماماندار قىزمەت كورسەتتى. قاجەت بولعان جاعدايدا پاتسيەنتتەرگە قوسىمشا تەكسەرۋلەر مەن ەمدەلۋگە جولدامالار بەرىلدى.

جوسپار بويىنشا بيىل پويىز بارلىعى 123 ستانسياعا بارىپ، 90 مىڭعا جۋىق قازاقستاندىققا كومەك كورسەتەدى. پويىزدىڭ مارشرۋتى تولىققاندى مەديتسينالىق ينفراقۇرىلىمى جوق ەلدىڭ وڭىرلەرىن قامتيدى.

جوبانى Samruk-Kazyna Trust كورپوراتيۆتىك قورى دەنساۋلىق ساقتاۋ مينيسترلىگىنىڭ، ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن «سامۇرىق-قازىنا» كومپانيالار توبىنىڭ اتىنان ىسكە اسىرىپ كەلەدى.