جەتىسۋ سپورتشىلارى بيىل 1760 مەدال جەڭىپ الدى

جىل قورىتىندىسى بويىنشا جەتىسۋ وبلىسىنىڭ سپورتشىلارى بارلىق دەڭگەيدەگى جارىستاردا 1760 جۇلدەلى ورىندى جەڭىپ العان. ونىڭ 602 التىن، 605 كۇمىس جانە 553 قولا مەدال بار، دەپ حابارلايدى Kazinform.

جەتىسۋ وبلىسىندا دەنە شىنىقتىرۋ- ساۋىقتىرۋ كەشەندەرىنىڭ جۇمىسى جانداندى. قازىر ءوڭىردىڭ 5 اۋدانىندا ارنايى ورتالىقتار جۇمىس ىستەيدى. بۇل قاتاردا پانفيلوۆ اۋدانىنىڭ جاركەنت قالاسىنداعى، الاكول اۋدانىنىڭ ءۇشارال قالاسىنداعى، كوكسۋ اۋدانىنىڭ بالپىق ءبي اۋىلىنداعى، ەسكەلدى اۋدانىنىڭ قارابۇلاق اۋىلى جانە اقسۋ اۋدانىنىڭ جانسۇگىروۆ اۋىلىنداعى كاسىبي سپورت كەشەندەرى بار.

«وبلىستا جىل باسىنان بەرى 5 حالىقارالىق، 32 رەسپۋبليكالىق، 129 وبلىستىق، 120 اۋداندىق (قالالىق) تۋرنير، اۋىلدىق جەرلەردە 384 ءىس-شارا وتكىزىلدى. بيىل 17 حالىقارالىق دارەجەدەگى سپورت شەبەرى، 103 سپورت شەبەرى، 726 سپورت شەبەرىنە كانديدات جانە 287 ءبىرىنشى سپورتتىق رازريادتى سپورتشى دايىندالدى»، - دەيدى وبلىستىق دەنە شىنىقتىرۋ جانە سپورت باسقارماسىنىڭ وليمپيادالىق سپورت تۇرلەرى، سپورت رەزەرۆى جانە مەملەكەتتىك قىزمەتتەر ءبولىمىنىڭ باسشىسى سايات سارقىتوۆ.

بۇگىندە وبلىستا 25 سپورت مەكتەبى، ونىڭ ىشىندە 8 وليمپيادالىق رەزەرۆ مەكەمەسى بار. مۇندا 49 سپورت ءتۇرى بويىنشا 22 مىڭنان استام سپورتشى جاتتىعادى. ونىڭ ىشىندە 28 وليمپيادالىق جانە 21 وليمپيادالىق ەمەس سپورت تۇرلەرىمەن اينالىسادى. سونداي-اق اككرەديتتەلگەن 50 سپورت فەدەراتسياسى مەن 5 سپورت كلۋبى جۇمىس ىستەپ تۇر.