جەتىم بالالاردى ازاپتاعان ەمشى وقيعاسى: ءبىرقاتار قىزمەتكەر جازالاندى
استانا. KAZINFORM - شىمكەنتتە اسىراپ العان بالالارىنا جاۋىزدىق تانىتتى دەپ كۇدىككە ىلىنگەن ەمشى ىسىنەن سوڭ ءبىلىم سالاسىنىڭ ءبىرقاتار قىزمەتكەرى جازالاندى.
وگەي اكەسى يت پەن مىسىق ەتىن بەرىپ، ءزارىن ىشكىزدى دەلىنگەن جاسء وسپىرىم بالا وقيتىن مەكتەپ ديرەكتورىن جۇمىستان بوساتۋ ماسەلەسى قارالىپ جاتىر.
قالالىق ءبىلىم باسقارماسى قامقورشىلىق جانە قورعانشىلىق ءبولىمىنىڭ باسشىسى نۇرداۋلەت ابىلايەۆتىڭ ايتۋىنشا، پەداگوگتەر اسىراندى بالالاردىڭ قيىن جاعدايدا ءومىر ءسۇرىپ جاتقانىن بۇعان دەيىن بىلگەن جانە دەر كەزىندە دابىل قاقپاعان. وسى ارەكەتى ءۇشىن مەكتەپ ديرەكتورىنىڭ تاربيە ءىسى جونىندەگى ورىنباسارى، جاس ءوسپىرىم بالانىڭ سىنىپ جەتەكشىسى، پەداگوگ پسيحولوگ، الەۋمەتتىك پەداگوگكە قاتاڭ ەسكەرتۋ تۇرىندەگى تارتىپتىك شارا قولدانىلعان.
«اسىراپ الۋعا بەرىلگەن بالا مەكتەپكە نەمەسە بالاباقشاعا بارسا، ءبىز ونداعى ماماندارمەن كۇندەلىكتى بايلانىستامىز. ولار قانداي بار جايتتاردى بايقاسا، دەرەۋ بىزگە حابار بەرۋى كەرەك. جاس ءوسپىرىم بالا ومىرىندەگى قيىندىقتارى تۋرالى مەكتەپكە بىرنەشە اي بۇرىن ايتقان. الايدا مەكتەپ بىزدەن جاسىرعان. قازىر ءبىلىم باسقارماسى تاراپىنان مەكتەپ ديرەكتورىن ارنايى باپپەن جۇمىستان بوساتۋ ماسەلەسى قارالىپ جاتىر» ، - دەدى نۇرداۋلەت ابىلايەۆ.
ءبولىم باسشىسى شىمكەنتتەگى بالالار ءۇيى مەن استانا، الماتى جانە وسكەمەندەگى بوبەكتەر ءۇيىنىڭ تاربيەلەنۋشىلەرى رەسپۋبليكا بويىنشا بالالاردى اسىراپ الۋعا نيەتتى ۇمىتكەرلەر بازاسى ارقىلى تاڭداپ الىنعانىن ايتتى. شىمكەنتتىك ەمشى مەن ونىڭ ايەلى 6 بالانىڭ بارلىعىن پاتروناتتىق تاربيەگە العان، كەيىن ونىڭ ەكەۋىن سوت شەشىمىمەن زاڭ اياسىندا اسىراپ العان. قالعان تورتەۋى قامقورلىقتارىندا قالا بەرگەن.
نۇرداۋلەت ابىلايەۆ قورعانشىلىق قىزمەتكەرلەرى بەكىتىلگەن تالاپ بويىنشا بۇل بالالار تۇراتىن وتباسىعا بارىپ، تەكسەرۋ جۇمىستارىن جۇرگىزگەنىن العا تارتتى.
«مەملەكەتتىك قورعانشىلىق جانە قامقورشىلىق جونىندەگى فۋنكتسيالارىن جۇزەگە اسىرۋ قاعيدالارىن بەكىتۋ تۋرالى ۇكىمەتتىڭ №382 قاۋلىسى بار. سوعان سايكەس ءبىز 6 ايدا ءبىر رەت بالا قامقورلىققا بەرىلگەن مەكەنجايعا بارىپ، تەكسەرۋ جۇمىستارىن جاسايمىز. ءبىزدىڭ قىزمەتكەرلەر بىلتىر قازان ايىندا بۇل مەكەنجايعا بارعان. ول كەزدە ۇلكەن بالا ۇيدە بولماعان، قالعان بالالاردىڭ كيىمدەرى ءبۇتىن، سىرتتاي قاراعاندا دەنە جاراقاتتارى بايقالماعان. ءبىز بەلگىلى ءبىر شاعىم تۇسپەسە جانە جاۋاپتى ارنايى ورگان وكىلدەرىنسىز ولاردىڭ كيىمىن شەشىپ، تەكسەرۋ جۇرگىزە المايمىز»، - دەدى ول.
ارنايى كوميسسيا اكت تولتىرىپ، وگەي اكە تاراپىنان جاۋىزدىق كوردى دەلىنگەن بالالاردى 13-اقپاندا (سەيسەنبى كۇنى: اۆت) بۇل وتباسىنان الىپ كەتكەن. ونىڭ ەكەۋى كامەلەتكە تولماعانداردى بەيىمدەۋ ورتالىعىنا، قالعان تورتەۋى بوبەكتەر ۇيىنە ورنالاستىرىلعان. ءبىر قىزىعى، ءبولىم باسشىسى بالالاردىڭ جاعدايى تۋرالى حاباردى جۇما كۇنى (9-اقپاندا: اۆت) ەستىدىك، ءبىراق ول كۇنى جۇمىس اپتاسىنىڭ سوڭى بولعان سوڭ، بارىپ ۇلگەرمەگەنىن ايتىپ وتىر.
ءبىلىم باسقارماسى اتالعان وقيعاعا قاتىستى ارنايى باسپا ءسوز ءماسليحات ۇيىمداستىرىپ، سول كەزدە بارلىق سۇراققا جاۋاپ بەرەمىز دەپ ۋادە ەتتى.
قالالىق دەنساۋلىق ساقتاۋ باسقارماسىنداعىلار بالالار مەديتسينالىق تەكسەرۋدەن وتكەن كەزدە دەنەلەرىندە ۇرىپ-سوعۋ بەلگىلەرى، كوپتەگەن كوگەرۋلەر، جارالار، سىزاتتار جانە كىشكەنتاي تىرتىقتار بولعانىن ايتتى.
«ولارعا دەر كەزىندە مەديتسينالىق ەمدىك شارالار تاعايىندالدى. بۇگىنگى تاڭدا ءتۇرلى دارۋمەندەردى، ەمدىك ماسساجدار قابىلداۋدا. ولارمەن پسيحولوگ ماماندارى دا جۇمىس ىستەپ جاتىر. بوبەكتەر ۇيىندەگى بۇلدىرشىندەر كۇندەلىكتى مونتەسسوري ساباقتارىنا قاتىسۋدا. قازىرگى تاڭدا ولار سالماق قوسىپ، جاعدايى جاقساردى. دەندەرى ساۋ»، - دەدى دەنساۋلىق باسقارماسىنداعىلار.
بۇعان دەيىن بالالار ومبۋدسمەنىنىڭ شىمكەنت قالالىق وكىلى جاننەتا جازىقبايەۆا KAZINFORM تىلشىسىنە بەرگەن سۇحباتىندا بالالاردى اسىراپ العان ەمشى وسىدان 10 جىل بۇرىن ادام ەمدەپ وتىرىپ، ءبىر ايەلدى ءولتىرىپ العانىن ايتقان بولاتىن. كەيىن پسيحيكالىق اۋىتقۋى بار دەگەن انىقتامامەن جازادان قۇتىلىپ كەتكەن. بۇل تۋرالى پوليتسياعا جاۋاپ بەرۋ كەزىندە ەمشىنىڭ ءىنىسى بايقاۋسىزدا ايتىپ قالعان كورىنەدى.
سونداي-اق، جاننەتا جازىقبايەۆا شىمكەنتتىك ەمشى قازىرگى تاڭدا الماتىداعى پسيحديسپانسەردە جاتقانىن ايتتى.
قالالىق پوليتسيا دەپارتامەنتى قوعامدىق رەزونانس تۋدىرعان وقيعا بويىنشا كۇدىكتىنىڭ بۇعان دەيىن ءىستى بولعانى نە بولماعانى تۋرالى مالىمەت بەرمەدى. ونىڭ ۇستىنەن قىلمىستىق ءىستىڭ 110-بابى (قيناۋ) جانە 140-بابى (كامەلەتكە تولماعان بالالاردى تاربيەلەۋ جونىندەگى مىندەتتەردى ورىنداماۋ) بويىنشا ءىس قوزعالىپ، قازىر ۋاقىتشا يزولياتورىندا قاماۋدا ەكەنىن مالىمدەدى. اتالعان ءىس بويىنشا كۇدىكتى تەك ءبىر ادام. ونىڭ ايەلىنەن ۇستىنەن ءىس قوزعالماعان.
ءىستى جۇرگىزگەن تەرگەۋشى تەرگەپ-تەكسەرۋ جۇمىستارى اياقتالىپ، پروكۋراتۋراعا جولدانعانىن ايتتى.
قالالىق سوتتىڭ باسپا ءسوز قىزمەتىنىڭ مالىمەتىنشە، قىلمىستىق ءىس وسى اپتا ىشىندە سوتقا كەلىپ ءتۇسۋ كەرەك.
بالالارىنا جاۋىزدىق تانىتتى دەگەن ەمشىنىڭ وتكەنى مەن جالپى مىنەز-قۇلقى تۋرالى ءبىلۋ ءۇشىن كورشىلەرىمەن تىلدەسۋگە تىرىستىق. ولار بالالار وزگە بۇلدىرشىندەر سەكىلدى كوشەگە ويناۋعا شىقپايتىنىن، جالپى بۇل وتباسى كورشىلەرىمەن ارالاسپايتىنىن ايتتى.
«شىنى كەرەك، ول كىسىمەن ارالاسپايمىز. تاۋىپكەرشىلىگى بار عوي، ادام قابىلدايدى. ءبىراق قازىر ەشكىم كەلمەي قويدى. ءوزى دە كورىنبەيدى.. . نەگىزى ءبىز ونىمەن ارالاسپايمىز. بالالارىن ەسىك قاقپاسىنان شىعارمايدى. تەك ۇلكەن بالاسى ساباققا بارىپ كەلەتىن»، - دەدى كورشىلەرى.
ەسكە سالساق، ءبىز بۇعان دەيىن شىمكەنتتە جەرگىلىكتى تانىمال ەمشىنىڭ 6 بالانى اسىراپ الىپ، ولارعا يت پەن مىسىق ەتىن بەرگەنىن، ءۇش جىلدان بەرى ازاپتاپ كەلگەنىن جازعان بولاتىنبىز.
