جۇرەگى ءتورت رەت توقتاپ قالعان: الماتىلىق دارىگەرلەر ناۋقاستى تاڭعاجايىپ جاعدايدا امان الىپ قالدى

الماتى. KAZINFORM - الماتىدا 42 جاستاعى ناۋقاس قالالىق كارديولوگيالىق ورتالىققا جەدەل جاردەم بريگاداسىمەن جەدەل ميوكارد ينفاركتى دياگنوزىمەن جەتكىزىلدى. قابىلداۋ كەزىندە ناۋقاستىڭ جۇرەگى توقتاپ قالعان، - دەپ حابارلايدى قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى.

دارىگەرلەر دەرەۋ جانساقتاۋ شارالارىن جاساعان. رەانيماتسيا جانە قارقىندى تەراپيا بولىمشەسىنىڭ مەڭگەرۋشىسى عاني بۋگيرايەۆتىڭ ايتۋىنشا، ناۋقاستىڭ جۇرەگى 15 مينۋت ىشىندە ءتورت رەت توقتاعان. ناۋقاس اۋىر جاعدايدا بولعانىنا قاراماستان، رەانيماتولوگتار جۇرەكتىڭ جۇمىسىن قالپىنا كەلتىردى.

«ناۋقاستىڭ جاعدايى تۇراقتالعاننان كەيىن وعان جەدەل كوروناروگرافيا جاسالدى. تامىرلار زارداپ شەككەنىن بىلگەننەن كەيىن دارىگەرلەر جۇرەك بۇلشىق ەتىندەگى قان اينالىمدى قالپىنا كەلتىرۋ ءۇشىن شۇعىل وتا جاساۋ تۋرالى شەشىم قابىلدادى»، - دەپ جازىلعان حابارلامادا.

ناۋقاستىڭ ءومىرىن ساقتاۋدا شەشۋشى ءرولدى بۇكىل كوماندا - رەانيماتولوگ، ينتەرۆەنتسيالىق حيرۋرگ جانە انەستەزيولوگتار اتقارعان.

عاني بۋگيرايەۆ مۇنداي جاعداي تەك كاسىبي داعدىنى ەمەس، پسيحولوگيالىق تۇراقتىلىقتى دا قاجەت ەتەتىنىن ايتتى.

قازىر ناۋقاستىڭ جاعدايى تۇراقتالىپ، ۇيگە شىعارىلعانى بەلگىلى بولدى.