جەرلەستەرى جاقسىلىق ۇشكەمپىروۆتى ەسكە الدى
تاراز. KAZINFORM - جامبىلدىقتار الماتى قالاسىنداعى «كەڭساي» زيراتىنا بارىپ، دانقتى سپورتشى، ءبىرتۋار تۇلعا، ەڭبەك ەرى جاقسىلىق ۇشكەمپىروۆتىڭ رۋحىنا قۇران باعىشتادى. راسىمگە مارقۇمنىڭ جاقىن تۋىستارى دا قاتىستى.
بۇداڭ سوڭ قازاقتان شىققان تۇڭعىش وليمپيادا جانە الەم چەمپيونى جاقسىلىق ۇشكەمپىروۆتىڭ رۋحىنا اس بەرىلدى.
ەسكە الۋ شاراسىنا الماتى وبلىسىنىڭ اكىمى مارات سۇلتانعازيەۆ، جامبىلدىق سپورت سالاسىنىڭ ارداگەرلەرى مەن شەبەرلەرى، باپكەرلەر، ونەر مايتالماندارى جانە مارقۇمنىڭ تۋعان-تۋىستارى، ءبىرقاتار زامانداس دوستارى جينالدى.
باسقوسۋدا الدىمەن الماتى وبلىسىنىڭ اكىمى مارات سۇلتانعازيەۆ ءسوز الىپ، تۇلعا تۋرالى ورامدى ويلارىن ورتاعا سالدى.
سونداي-اق جامبىل وبلىسىنىڭ اكىمى ەربول قاراشوكەيەۆ ەڭبەك ەرى جاقسىلىق ۇشكەمپىروۆتىڭ ونەگەلى ومىرىنە، بيىك بولمىسى مەن پاراسات، ادامگەرشىلىك قاسيەتتەرىنە توقتالىپ، ەلەۋلى ەرلىگى مەن ەڭبەگىن باسا ايتتى.
بۇدان بولەك، ءوڭىر باسشىسى دانقتى سپورتشىنىڭ ارمانىن 44 جىلدان كەيىن ورىنداپ، وليمپيادا چەمپيونى اتانعان ەلدوس سمەتوۆتىڭ دە تاريحي جەڭىسىن ەرەكشە اتاپ ءوتتى.
وبلىس اكىمى ەلدوس سمەتوۆتى كۇتىپ الۋعا، سىي-سياپات جاساۋعا اتسالىسقان ءبىرقاتار دەمەۋشىلەر مەن ونەر جۇلدىزدارىن ماراپاتتاپ، العىس ايتتى.
جامبىل وبلىستىق ارداگەرلەر كەڭەسىنىڭ ءتوراعاسى ەركىنبەك سولتىبايەۆ، ءماسليحات ءتوراعاسى ابدالى نۇراليەۆ، جاقسىلىق ءامىرالى ۇلىنىڭ جۇبايى كۇلپان ۇشكەمپىروۆا جانە اعايىن-تۋىستارى، ونەر جۇلدىزدارى، پاريج وليمپياداسىنىڭ چەمپيونى ەلدوس سمەتوۆ پەن كۇمىس جۇلدەگەرى دەمەۋ جادىرايەۆ ءسوز الىپ، تۇلعا تۋرالى ەستەلىكتەرىن ءبولىستى.
اق باتا بەرىلىپ، تۇلعا رۋحىنا قۇران باعىشتالدى.
