جۇرەك ءجيى سوققاندا
دونورلىق جۇرەك ترانسپلانتاتسياسى - جۇرەك- قان تامىرلارى جۇيەسى اۋىر اۋرۋلارىن ەمدەۋدىڭ جالعىز جولى.
الايدا مۇنداي كۇردەلى وپەراتسيالار قايتىس بولعاننان كەيىنگى دونوردان، ونىڭ جاقىن تۋىستارىنىڭ كەلىسىمىن العان كەزدە عانا جۇزەگە اسىرىلادى. تىندەردىڭ ۇيلەسىمدىلىگى، قان توپتارى، باسقا مەديتسينالىق فاكتورلار مەن كورسەتكىشتەر دە ەسكەرىلەدى.
UMC جۇرەك ورتالىعىنىڭ پاتسيەنتى ينديرا سماعۇلوۆا ءوزىنىڭ تولىققاندى، سالاماتتى ءومىر ءسۇرۋ مۇمكىندىگىن ۇزاق كۇتتى. 2022 -جىلعى 13-قاڭتاردا تاڭەرتەڭ كلينيكا دارىگەرى دونوردان جۇرەك ترانسپلانتاتسياسىنىڭ مۇمكىندىگى تۋرالى حابارلادى. ينديراعا 2012 -جىلى كەڭەيتىلگەن كارديوميوپاتيا دياگنوزى قويىلدى. بۇل اۋرۋدا جۇرەك قۋىستارى مەن ولشەمدەرى ۇلعايادى، ول ءوز كەزەگىندە جۇرەك جەتكىلىكسىزدىگىنىڭ دامۋىنا، اعزانىڭ قاندى ءتيىمدى ايداي الماۋىنا اكەلەدى.
2018 -جىلى UMC باسقارما ءتوراعاسى، كارديوحيرۋرگ يۋري پيا باستاعان كلينيكا توبى پاتسيەنتكە «Jarvik» مەحانيكالىق سورعىسىن ءساتتى يمپلانتاتسيالادى. بۇل تولىق يمپلانتاتسيالاناتىن جۇرەكتى قولداۋ جۇيەسى پاتسيەنتتەردىڭ ءومىر ءسۇرۋ ساپاسىن ۇزارتۋ، جاقسارتۋ ماقساتىندا جاسالادى، كوبىنەسە «ترانسپلانتاتسياعا كوپىر» بولىپ تابىلادى. «Jarvik» تەحنولوگياسى LVAD قۇرىلعىلارىنىڭ ەكىنشى بۋىنى بولىپ، ۇزاقمەرزىمدى پايدالانۋدا جوعارى ساپا كورسەتتى. قۇرىلعىنى يمپلانتاتسيالاۋ پاتسيەنتتىڭ جاعدايىن جاقسارتۋعا كومەكتەستى، كەلەسى بىرنەشە جىل ىشىندە ينديرا ءوزىن جايلى سەزىندى، جۇرەك ترانسپلانتاتسياسىن كۇتۋ تىزىمىندە بولدى.
«دەنساۋلىق جاعدايىنا بايلانىستى استاناعا كوشىپ كەلدىم، دونورلىق جۇرەكتى كۇتىپ، مەحانيكالىق قۇرىلعىمەن 4 جىل ءجۇردىم. كلينيكادان قوڭىراۋ تۇسكەن كەزدە جاڭا ومىرگە مۇمكىندىك بار ەكەنىن بىردەن ءبىلدىم. كلينيكا توبى وپەراتسيانى ءساتتى جۇرگىزىپ، قالپىنا كەلتىرۋگە كومەكتەستى. UMC جۇرەك ورتالىعىنىڭ ۇجىمىنا، بارلىق دارىگەرلەرگە العىسىمدى بىلدىرەمىن»، دەيدى پاتسيەنت.
قازىرگى ۋاقىتتا پاتسيەنتتىڭ جاعدايى جاقسى، ول جوسپارلى تەكسەرۋلەرگە قاتىسىپ، قاجەتتى ءدارى-دارمەكتەردى قابىلداۋدى جالعاستىرىپ جاتىر. تۇراقتى جۇمىسى بار ينديرا كۇن سايىن دونور مەن ونىڭ تۋىستارىنا ءومىر سۇرۋگە مۇمكىندىك بەرگەنىنە العىس ءبىلدىرىپ وتىرادى.
وسى ۋاقىتقا دەيىن UMC جۇرەك ورتالىعىنىڭ كومانداسى 98 جۇرەك ترانسپلانتاتسياسىن جاسادى. ونىڭ ىشىندە ەكى وپەراتسيا كلينيكا ماماندارىنىڭ قاتىسۋىمەن العاش رەت شىمكەنت قالاسىندا، ءبىر وپەراتسيا الماتى قالاسىندا جۇرگىزىلدى. ستاتيستيكاعا سايكەس، ەلدە ورگان ترانسپلانتاتسياسىن كۇتۋ تىزىمىندە 4000 پاتسيەنت بار، ونىڭ 140 ى جۇرەك ترانسپلانتاتسياسىن قاجەت ەتەدى.
Egemen Qazaqstan
