جۇمىس ىستەيمىن دەگەن ادامعا جاقسى مۇمكىندىك: ەلوردا تۇرعىنى جاڭا ماماندىقتى قالاي يگەرگەنىن ايتتى

استانا. قازاقپارات – «JOLTAP» جوباسىنىڭ ارقاسىندا استانالىقتار تۇراقتى جۇمىس تاۋىپ، قارجىلىق جاعدايىن جاقسارتىپ، جاڭا ماماندىق يگەرىپ جاتىر.

مۇندا قاتىسۋشىلار سيفرلىق جانە جۇمىسشى ماماندىقتارىن وقىپ، سەرتيفيكات الادى. وسى ۋاقىتقا دەيىن قاتىسۋشىلاردىڭ ءبىر بولىگى تەحنيكالىق ماماندىقتاردى يگەرسە، ەندى ءبىر بولىگى سيفرلىق سالانىڭ ءتىلىن مەڭگەرىپ جاتىر، دەپ حابارلايدى inbusiness.kz سايتى قالا اكىمدىگىنە سىلتەمە جاساپ.

سولاردىڭ ءبىرى - ەلوردالىق 30 جاستاعى ابىلبەك سادىقوۆ. ول ءبىراز ۋاقىت قۇرىلىستا جۇمىس ىستەگەن. الايدا كەيىن قىسقارتىلىپ، جۇمىسسىز قالعان.

«ءبىر كۇنى كوشەدە كەتىپ بارا جاتىپ وسى جوبا تۋرالى جارناماعا كوزىمە ءتۇستى. سودان قالاداعى «بارشاعا مۇمكىندىك» مودۋلدىك پۋنكتەرىنىڭ بىرىنە بارىپ، دانەكەرلەۋشى سالاسى بويىنشا تەگىن وقىتۋ كۋرسىنا جازىلدىم. قاڭتار ايىنىڭ ورتاسىنان كەيىن جازىلدىم، ال وقىتۋ اقپان ايىنىڭ باس كەزىندە باستالدى»، - دەدى ابىلبەك نۇرسەيىت ۇلى.

ونىڭ ايتۋىنشا، ءبىر ايدىڭ ىشىندە بۇل ماماندىقتى مەڭگەرىپ شىققان. سەبەبى ساباق كۇن سايىن وتكەندىگىن ايتادى.

«وقىتۋ كۋرسى ءبىر اي بولدى. كۋرس بارىسىندا كوپتەگەن سۇراققا جاۋاپ الدىق. بارلىق نارسەنى تاجىريبە جۇزىندە كورسەتىپ، ۇيرەتتى. توپتا ادام كوپ ەمەس. ساباقتار وتە قىزىقتى جانە مازمۇندى ءوتتى»، - دەدى قاتىسۋشى.

قازىرگى كەزدە ول قالاداعى زاۋىتتاردىڭ بىرىندە دانەكەرلەۋشى بولىپ جۇمىس ىستەيدى.

«بۇل جوبانىڭ كوپكە تيگىزەر پايداسى مول. سەبەبى «JolTap» ارقىلى ءار ادام جاڭا ماماندىق يگەرە الادى، بولماسا بىلىكتىلىگىن ارتتىرادى. باستىسى جۇمىس ىستەيمىن دەگەن ءار ادامعا بۇل جاقسى مۇمكىندىك»، - دەدى ابىلبەك سادىقوۆ.

تالاي ادامعا مۇمكىندىك بەرىپ، جۇمىس ىستەۋگە جاعداي جاساعان بۇل جوبا استانا قالاسى اكىمدىگىنىڭ باستاماسىمەن جۇزەگە اسىپ وتىر. جوباعا 18-50 جاس ارالىعىنداعى كەز كەلگەن ەلوردالىق قاتىسا الادى. نەگىزگى ماقسات - استانالىقتاردىڭ تابىسىن ارتتىرۋعا جاعداي جاساۋ، سول ارقىلى ەلوردالىقتاردىڭ الەۋمەتتىك جاعدايىن جاقسارتۋدى جولعا قويۋ.