جەمقورلىق تاۋەكەلدەرىن جويماعان باسشىلارعا جازا قولدانىلادى
استانا. KAZINFORM - داۋازىمدى ادامداردىڭ جەمقورلىققا قارسى شارالاردى قابىلداماعانى ءۇشىن جاۋاپتىلىعىنىڭ قۇقىقتىق تەتىكتەرىن جەتىلدىرىلەدى.

بۇل تۋرالى ءماجىلىستىڭ جالپى وتىرىسىندا سىبايلاس جەمقورلىققا قارسى ءىس- قيمىل ماسەلەلەرى بويىنشا زاڭ جوباسىن تالقىلاۋ كەزىندە ق ر سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ءبىرىنشى ورىنباسارى ۇلان سارقۇلوۆ ءمالىم ەتتى.
- سىبايلاس جەمقورلىققا قارسى ءىس- قيمىل بويىنشا شارالار قابىلداماعانى ءۇشىن جاۋاپكەرشىلىكتىڭ قۇقىقتىق تەتىكتەرىن جەتىلدىرۋ قاراستىرىلدى. «سىبايلاس جەمقورلىققا قارسى ءىس- قيمىل تۋرالى» زاڭعا سايكەس، سىبايلاس جەمقورلىق تاۋەكەلدەرىن سىرتقى جانە ىشكى تالداۋ ناتيجەلەرى بويىنشا مەملەكەتتىك ورگاندار، ۇيىمدار جانە كۆازيمەملەكەتتىك سەكتور سۋبەكتىلەرى سىبايلاس جەمقورلىقتىڭ تۋىنداۋ سەبەپتەرى مەن جاعدايلارىن جويۋ جونىندە شارالار قابىلدايدى. سىرتقى تالداۋدى اگەنتتىك جۇرگىزەدى، سىبايلاس جەمقورلىق تاۋەكەلدەرىنە ىشكى تالداۋدى - مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى دەربەس جۇرگىزەدى. بۇل تالداۋلاردىڭ قورىتىندىلارى بويىنشا سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋ جونىندەگى ءىس- شارالار جوسپارى بەكىتىلەدى. ءىس جۇزىندە مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرى سىبايلاس جەمقورلىق تاۋەكەلدەرىن جويۋ جونىندەگى ۇسىنىمداردى ورىنداۋدى كەشىكتىرەتىن جاعدايلار ورىن الادى. بۇل ءوز كەزەگىندە جاڭا سىبايلاس جەمقورلىق قۇقىق بۇزۋشىلىقتار جاساۋعا الىپ كەلەدى، - دەدى ۇلان سارقۇلوۆ.
وسىعان بايلانىستى، «سىبايلاس جەمقورلىققا قارسى ءىس- قيمىل تۋرالى» زاڭ باسشىلارعا تارتىپتىك جازا قولدانۋ ءۇشىن «سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويماۋ» سياقتى نەگىزدەمەمەن تولىقتىرىلادى.
بۇدان بۇرىن حابارلانعانداي، بۇل زاڭ جوباسى اياسىندا اۋىر جانە اسا اۋىر سىبايلاس جەمقورلىق قىلمىستار جاساعانى ءۇشىن سوتتالعانداردىڭ جاريا ءتىزىلىمى ەنگىزىلەدى.