ەلوردالىق «جاستار تەاترى» پاۆلوداردا وتكەن تەاتر فەستيۆالىنىڭ باس جۇلدەسىن جەڭىپ الدى
پاۆلودار. KAZINFORM - استانا قالاسى اكىمدىگىنىڭ «جاستار تەاترى» «ەرتىس- بايان» رەسپۋبليكالىق تەاتر فەستيۆالىندە جەڭىمپاز اتاندى.
رەجيسسەر د. سەرعازيننىڭ «كۇيەۋ بالا» سپەكتاكلىن قازىلار القاسى ەڭ ۇزدىك دەپ تانىپ، باس جۇلدەگە تىگىلگەن 1,5 ميلليون تەڭگە ەلوردالىق اكتەرلەرگە بۇيىردى.
پاۆلوداردا الاش ارىسى جۇسىپبەك ايماۋىتوۆتىڭ 135 جىلدىق مەرەيتويىنا ارنالعان «ەرتىس- بايان» رەسپۋبليكالىق تەاتر فەستيۆالى ءوز مارەسىنە جەتتى. 11 تەاتر، جالپى سانى 288 اكتەر قاتىسقان ونەر دوداسىندا بەگزادا كورەرمەن ەلىمىزدەگى ەڭ ۇزدىك تۋىندىلاردى تاماشالاپ، رۋحاني ءلاززات الدى. مادەني مايداننىڭ لەبىن سەزىندى.
ۇيىمداستىرۋشى - جۇسىپبەك ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترىنىڭ باسشىسى ارمان تەمىربەك اتاپ وتكەندەي، فەستيۆال ماقساتى - قازاق تەاترلارى اراسىندا تاجىريبە الماسىپ، دوستىقتى نىعايتۋ، اكتەرلەر مەن كورەرمەن اراسىندا التىن كوپىر سالۋ.
قازاقستاننىڭ ەڭبەك سىڭىرگەن قايراتكەرى، م. اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك باستاعان قازىلار القاسى بارلىق سپەكتاكلدى تالقىلاپ، ءادىل باعاسىن بەرۋگە تىرىستى.
ونەر بايگەسىندە استانادان كەلگەن «جاستار تەاترىنىڭ» باعى جانىپ، باس جۇلدەنى جەڭىپ الدى. اتالعان ۇجىم رەجيسسەر ءارى اكتەر داۋرەن سەرعازيننىڭ «كۇيەۋ بالا» دراماسىمەن قاتىسىپ، كورەرمەننىڭ ىستىق ىقىلاسىنا بولەندى. ال، پاۆلودارلىق ايماۋىتوۆ تەاترى («ريچارد» تراگيفارس، رەجيسسەرى س. ليەۆيتسكي) پاۆلودار وبلىسى اكىمىنىڭ ارنايى جۇلدەسىن يەلەندى.
«ۇزدىك انسامبل» نوميناتسياسىنا - اباي اتىنداعى اباي وبلىستىق قازاق مۋزىكا- دراما تەاترى («اباي ايتقان ەڭلىك- كەبەك» تراگەدياسى، رەجيسسەرى ج. جۇمانباي)، «ۇزدىك رەجيسسۋرالىق شەشىم» نوميناتسياسىنا - ەلوردالىق «جاستار تەاترى»، «ۇزدىك ستسەنوگرافيالىق شەشىم» نوميناتسياسىنا - س. سەيفۋللين اتىنداعى قاراعاندى وبلىستىق اكادەميالىق قازاق دراما تەاترى («قاراگوز» تراگەدياسى، رەجيسسەرى گ. بالپەيسوۆا) يە بولدى. ق. قۋانىشبايەۆ اتىنداعى قازاق ۇلتتىق مۋزىكالىق دراما تەاترى («ۆويتسەك» دراماسى، رەجيسسەرى. ۇ. قابىل) ج. ايماۋىتوۆتىڭ جيەنشارى پاۆەل ايماۋىتوۆ تىككەن ارنايى جۇلدەگە، ب. ريموۆا اتىنداعى تالدىقورعان دراما تەاترى («قازاقتىڭ تويى بىتپەسىن» دراماسى، رەجيسسەرى د. بازارقۇلوۆ) «Amanat» پارتياسى پاۆلودار وبلىستىق فيليالى ۇسىنعان ارنايى جۇلدەگە لايىقتى دەپ تانىلدى.
بۇعان قوسا جەكەلەي اكتەرلەردىڭ ۇزدىك ونەرى دە نازاردان تىس قالعان جوق. «ۇزدىك ەپيزودتىق ايەل ادام بەينەسى» نوميناتسياسىن «ريچارد» قويىلىمىنداعى گەرتسوگينا يورك ءرولى ءۇشىن ايماۋىتوۆ تەاترىنىڭ اكتەرى تالجىبەك اتامبەك، «ۇزدىك ەپيزودتىق ەر ادام بەينەسى» نوميناتسياسىن «تارتيۋف» كومەدياسىنداعى ءرولى ءۇشىن ش. قۇسايىنوۆ اتىنداعى اقمولا وبلىستىق قازاق مۋزىكالىق- دراما تەاترىنىڭ اكتەرى قايرات مىرزابولاتوۆ جەڭىپ الدى. ال «ۇزدىك ايەل ادام بەينەسى» نوميناتسياسى «اقان سەرى تۋرالى اڭىز» تراگەدياسىنداعى ءباتيمانىڭ ءرولىن سومداعان ءا. مامبەتوۆ اتىنداعى مەملەكەتتىك دراما جانە كومەديا تەاترىنىڭ اكتەرى اقبوتا ماكەجانوۆاعا، «ۇزدىك ەر ادام بەينەسى» نوميناتسياسى «شينەل» دراماسىنداعى ءرولى ءۇشىن ءسابيت مۇقانوۆ اتىنداعى سولتۇستىك قازاقستان وبلىستىق قازاق مۋزىكالىق- دراما تەاترىنىڭ اكتەرى يسلام جاقسىلىققا بۇيىردى.
