«جايلى مەكتەپتىڭ» قىتايلىق جيھازى بالا دەنساۋلىعىنا زياندى بولۋى مۇمكىن –دەپۋتات

استانا. قازاقپارات - «Samruk-Kazyna» ا ق قوعامدىق كەڭەسىنىڭ وتىرىسىندا «جايلى مەكتەپتەرگە» ساتىپ الىنىپ جاتقان جيھازدىڭ ساپاسىنا سىن ايتىلدى.

استانا قالاسى ءماسليحاتىنىڭ دەپۋتاتى قانات يبرايەۆ جەرگىلىكتى كوميسسيا قۇرامىندا «جايلى مەكتەپتەردىڭ» قۇرىلىسىمەن تانىسقانىن، سول كەزدە ءبىلىم وشاعىنا قويىلىپ جاتقان جيھازدىڭ ساپاسىنا بايلانىستى كۇماندى سۇراقتار تۋىنداعانىن ايتتى.

«سانيتارلىق- ەپيدەميولوگيالىق تالاپتاردا، مەملەكەتتىك ستاندارتتاردا مەكتەپتىڭ ىشىندە اشىق اق ءتۇس كوپ بولماۋ كەرەكتىگى ايتىلعان. «جايلى مەكتەپتەرگە» قويىلىپ جاتقان پارتالاردىڭ 90 پايىزى اق ءتۇستى. باستاۋىش سىنىپتاردا بيىكتىكتى رەتتەيتىن پارتالار جوق. بۇل بالالاردىڭ كوزىنە زياندى. وسىنى كورگەندە مەندە بىردەن سۇراق تۋىندادى. ديرەكتسياسى ۇيىمداستىرادى، باس مەردىگەر قۇرىلىس بارىسىنا، ءبىلىم باسقارمالارى مۇعالىمدەر مەن ديرەكتورلاردى تابۋعا، وقۋ-اعارتۋ مينيسترلىگى ءۇش اۋىسىمدى جويۋعا جاۋاپتى. سول ديرەكتورلار قابىلداۋ اكتىسىنە قول قويادى. مەن وسى مەكتەپتەردى قابىلدايتىن جەرگىلىكتى كوميسسياعا مۇشەمىن. مەكتەپتەردە قاۋىپسىزدىك تالاپتارىنىڭ ساقتالماعانىنا كىم جاۋاپ بەرەدى؟»- دەپ سۇرادى ول.

دەپۋتات ءبىلىم وشاعىنا پلاستيكتەن جاسالعان قىتايلىق جيھاز قويىلىپ جاتقانىنا الاڭداپ وتىر.

«جايلى مەكتەپتەرگە» ورناتىلىپ جاتقان جيھاز ۇلگىلەرىن ساراپتاماعا الۋعا بولماي ما؟ مەن ءىس باسىندا جۇرگەن ادام بولعاندىقتان تۇسىنەمىن. قازاقستاندا بولماعاندىقتان قىتايدان جيھاز اكەلگەن. مەن ول جيھازدىڭ بالالار ءۇشىن جەتكىلىكتى دەڭگەيدە ءقاۋىپسىز ەكەنىنە سەنىمدى ەمەسپىن. ويتكەنى ول جيھازدىڭ پلاستيگى اشىق سارى ءتۇستى، ءيىسى بار. تۇيىقتالعان كەڭىستىكتە مۇنداي ماتەريالدان قانداي دا ءبىر زيان بولۋى مۇمكىن. وسى كەمشىلىكتەر ءۇشىن كىم جاۋاپ بەرەدى؟» - دەدى قانات يبرايەۆ.

«Samruk-Kazyna Construction» اكسيونەرلىك قوعامىنىڭ باسشىسى ماۋلەن ايمانبەتوۆ «جايلى مەكتەپتىڭ» جيھازىنا قويىلاتىن تالاپ مەردىگەردىڭ بارىنە ءمالىم ەكەنىن، ونى ساقتاماعاندارعا قىزمەت اقىسى تولەنبەيتىنىن ايتتى.

«باستاۋىش مەكتەپتەردىڭ پارتاسى رەتتەلمەيدى دەگەن مالىمەتىڭىزدى ناقتى قاي مەكتەپتە ەكەنىن ناقتىلاي ايتساڭىز جاقسى بولادى. ويتكەنى «جايلى مەكتەپتەردىڭ» بارىندە باستاۋىش سىنىپتاردىڭ پارتاسىندا بيىكتىك رەتتەلەدى. ناقتى تالاپ قويىلعان. ونى كىم ساقتاماسا، ءار جاعداي بويىنشا جەكە تەكسەرەمىز. كىم جاۋاپ بەرەدى دەگەنگە كەلسەك، مەردىگەرلەرگە تالاپ قويىلعان. ول تالاپتى ورىنداماسا، اقىسى تولەنبەيدى»، - دەدى ول.

قانات يبرايەۆتىڭ ايتۋىنشا، 2016 -جىلعى №22046 مەملەكەتتىك ستاندارتتا وقۋ ورىندارىنداعى جيھازعا قويىلاتىن تالاپتار بەكىتىلگەن.

«تالاپ بويىنشا، مەكتەپ جيھازىنىڭ تەمىر قاڭقاسىنان باسقا بولىگىنىڭ بەتكى قاباتى اشىق ءتۇستى بولۋ كەرەك. ءبىراق وقۋ مەكەمەسىنىڭ جيھازىن ءبىرىڭعاي اق تۇسپەن بوياۋعا بولمايدى. قابىرعانىڭ ءتۇسى مەن ينتەرەر ديزاينى مەكتەپتىڭ ىشكى گيگيەناسىنا جاتادى. ياعني، ول دۇرىس بولماسا، وقۋشىلاردىڭ دەنساۋلىعىنا زياندى بولۋى مۇمكىن. مەنمۇندالاپ تۇرعان تۇستەر، سىنىپ پارتالارىنىڭ اق تۇسپەن بويالۋى، قايدا وندىرىلگەنى بەلگىسىز پلاستيك جيھازدىڭ كوپتىگى. «جايلى مەكتەپتەردى» ارالاعاندا كورگەنىمىز وسى. جيھاز وندىرىسىنەن ءسال- ءپال حابارى بار ادام مەكتەپتە اق پارتاعا تىيىم سالىنعانىن بىلەدى»، - دەيدى ول.