جاپونياداعى تايفۋن سالدارىنان ميلليونداعان ادام ەۆاكۋاتسيالاندى

استانا. KAZINFORM - كەشە، 28-تامىزدا جاپونيانىڭ وڭتۇستىك- باتىسىنا «شانشان» تايفۋنى قاتتى جەل مەن جاڭبىر اكەلىپ، ەلەكتر جۇيەلەرىن ىستەن شىعارىپ، اۋە قاتىناسىن شەكتەپ، ءىرى زاۋىتتاردى جابۋعا ءماجبۇر ەتتى. ميلليونداعان ادامدار ۇيلەرىنەن كوشىرىلدى. بۇل تۋرالى Reuters اگەنتتىگى حابارلادى.

ازىرگە كەمىندە ءۇش ادام قازا تاۋىپ، كوپتەگەن ادامدار جارالانعانى حابارلاندى. شەنەۋنىكتەر بۇل ايماقتاعى ەڭ كۇشتى داۋىلداردىڭ ءبىرى بولۋى مۇمكىن دەپ دابىل قاعۋدا. تايفۋن كيۋسيۋ ارالىنىڭ وڭتۇستىگىندەگى ميادزاكي قالاسىندا ۇيلەردىڭ تەرەزەلەرىن سىندىرىپ، قابىرعالاردى قيراتقان.

جىلدامدىعى سەكۋندىنا 50 مەتر (ساعاتىنا 180 ك م) تايفۋن ناگاساكي پرەفەكتۋراسىنىڭ ۋنزەن قالاسىنا كەپ سوققان. مەتەورولوگيا اگەنتتىگىنىڭ مالىمەتىنشە، تايفۋن سولتۇستىككە قاراي ساعاتىنا 15 شاقىرىم جىلدامدىقپەن جىلجۋدا.

Kyushu Electric Power Co كومپانياسىنىڭ مالىمەتى بويىنشا، جەتى پرەفەكتۋراداعى 230 مىڭعا جۋىق ءۇي شارۋاشىلىقتارى جارىقسىز قالعان.

مينيسترلەر كابينەتىنىڭ باس حاتشىسى ەسيماسا حاياسي تايفۋنمەن بايلانىستى وقيعالاردا ءۇش ادامنىڭ قازا تاپقانىن جانە ءبىر ادامنىڭ ءىز- ءتۇزسىز جوعالعانىن، تابيعي اپاتتاردى باسقارۋ اگەنتتىگى 45 ادامنىڭ جاراقات العانىن حابارلادى. ەل بويىنشا 5,2 ميلليوننان استام ادام ەۆاكۋاتسيالاندى.

كيۋسيۋدان كەيىن تايفۋن الداعى بىرنەشە كۇندە ورتالىق جانە شىعىس ايماقتارعا، سونىڭ ىشىندە ەل استاناسى توكيوعا جاقىندايدى دەپ كۇتىلۋدە، دەپ حابارلادى مەتەورولوگيالىق اگەنتتىك.

اقپاراتقا سايكەس، اۋە كومپانيالارى 800 گە جۋىق رەيستى توقتاتقان. كيۋسيۋ ارالىنىڭ كوپتەگەن اۋداندارىندا پويىزدار، جۇزدەگەن اۆتوبۋستار مەن پارومدار دا توقتاتىلدى.

ايتا كەتەيىك، بۇعان دەيىن جاپونيادا «شانشان» تايفۋنى جاقىنداۋىنا بايلانىستى 230 دان استام رەيس توقتاتىلعانىن جازعان ەدىك.