جاپون ۇكىمەتى جاپون بالالارىن قورعاپ قازا تاپقان قىتايلىق ايەلگە تاعزىم ەتتى

استانا. KAZINFORM - جاپونيانىڭ قىتايداعى ەلشىلىگى قىتايلىق ايەلدىڭ قايتىس بولۋىنا بايلانىستى مەملەكەتتىك تۋدى جارتىلاي ءتۇسىردى.

جاپونيانىڭ Kyodo News اقپارات اگەنتتىگىنىڭ حابارلاۋىنشا، جاپوندىق بالالاردى بۇزاقىلاردان قورعاۋ كەزىندە قازا تاپقان قىتايلىق ايەلگە جاپونيا ۇكىمەتى مەن حالقى ۇلكەن قۇرمەت كورسەتتى.

2024-جىلدىڭ 24-ماۋسىمىندا قىتايدىڭ جيانسۋ پروۆينتسياسىنىڭ سۋچجوۋ قالاسىندا تۇراقتا مەكتەپ اۆتوبۋسىن كۇتىپ تۇرعان جاپوندىق ايەل مەن ونىڭ بالاسىنا پىشاقپەن قارۋلانعان ءبىر قىتايلىق ەركەك (52 جاستا) شابۋىل جاساپ، جارالاپ كەتكەن.

زارداپ شەككەن انا 30 جاستا، ال بالا مەكتەپ جاسىنا تولماعان، ولار سول كەزدە ايالدامادا جەرگىلىكتى «جاپون مەكتەبىنىڭ» اۆتوبۋسىن كۇتىپ تۇرعان. اۆتوبۋستا باسقا بالالار دا بولعان ەكەن.

شابۋىلشى مەكتەپ اۆتوبۋسىنا مىنۋگە تىرىستى، ءبىراق ونى اۆتوبۋستاعى قىتايلىق ايەل توقتاتتى. قارسىلاسۋ بارىسىندا قىتايلىق ايەلدى شابۋىلداۋشى پىشاقتاپ، اۋىر جاراقاتتاعان.

وقيعا ورنىنا جەدەل جەتكەن پوليتسيا قىزمەتكەرلەرى پىشاق ۇستاعان شابۋىلشىنى ۇستادى، ال قىتايلىق ايەلدىڭ ەرلىك ارەكەتىنىڭ ارقاسىندا مەكتەپ اۆتوبۋسىنداعى كوپتەگەن جاپون بالالارى امان قالدى.

جەرگىلىكتى پوليتسيا ماۋسىمنىڭ 27-كۇنى پىشاقتالىپ، اۋىر جاراقات العان مەكتەپ اۆتوبۋسىنىڭ قىزمەتكەرى حۋ يۋپينگتى (54 جاستا) قۇتقارۋ جۇمىستارى ءساتسىز اياقتالىپ، وكىنىشكە وراي قايتىس بولعانىن حابارلادى.

جاپونيانىڭ قىتايداعى ەلشىلىگى ماۋسىمنىڭ 28 ءى كۇنى قىتايلىق Weibo پاراقشاسىندا:

«حۋ يۋپينگ حانىم جالعىز ءوزى بەيكۇنا ايەلدەر مەن بالالاردى قىلمىسكەردەن قورعادى. ءبىز ونىڭ باتىلدىعى مەن مەيىرىمدىلىگى قىتاي حالقىنىڭ جالپىعا ورتاق سەزىمىن بىلدىرەدى دەپ سانايمىز. ءادىل ارەكەتى ءۇشىن حۋ يۋپينگ حانىمعا العىسىمىزدى بىلدىرەمىز، جاتقان جەرى جايلى بولسىن»، - دەپ جازدى.

سونىمەن قاتار، جاپون تۋىنىڭ جارتىلاي ىلىنگەن سۋرەتى دە تاراتىلدى.

Kyodo News جاپونيانىڭ شانحايداعى باس كونسۋلدىعىنا سۇحبات بەرىپ، ءساۋىر ايىندا دا وقيعا بولعان جەردىڭ ماڭىندا ءبىر جاپوندىقتى بەيتانىس ادام پىشاقتاپ كەتكەنىن ءبىلدى.

قاۋىپسىزدىگى جاقسى دەپ سانالاتىن سۋچجوۋدا جاپوندىقتارعا بىرىنەن سوڭ ءبىرى جاسالعان شابۋىلدار، قىتايداعى جاپون قاۋىمىنىڭ الاڭداۋشىلىعىن تۋدىردى.

قىتاي سىرتقى ىستەر مينيسترلىگىنىڭ باسپا ءسوز حاتشىسى ماو نيڭ 25 ءى كۇنى وتكەن باسپا ءسوز ءماسليحاتىندا پوليتسيانىڭ شابۋىلدى كەزدەيسوقتىق دەپ باعالاعانىن جانە جاپونداردى نىساناعا العان ارەكەت ەمەس ەكەنىن باسا ايتىپ، مۇنداي وقيعانىڭ ورىن العانىنا وكىنىش ءبىلدىردى.

ول سونداي-اق قىتايدىڭ ءالى دە قاۋىپسىز ەل ەكەنىن اتاپ ءوتتى.