جاسى 40 تان اسقان ايەلگە بوسانۋعا بولا ما - اكۋشەر-گينەكولوگ جاۋابى
جاسى 40 تان اسقان ايەلدەر دەنى ساۋ بالالاردى ومىرگە اكەلە الادى. بۇل تۋرالى الماتى قالاسىنىڭ №2-پەريناتالدىق ورتالىعىنىڭ اكۋشەر-گينەكولوگى الفيا گاللياموۆا ايتتى، دەپ حابارلايدى Kazinform.
دارىگەردىڭ سوزىنشە، ايەل 40 جاستان كەيىن ومىرگە بالا اكەلۋى مۇمكىن، الايدا، وعان مۇقيات دايىندىق پەن سانالى ءتاسىل قاجەت. سەبەبى، ەرەسەك جاستاعى جۇكتىلىك كەيبىر قاۋىپتى اۋرۋلارعا اكەلۋى مۇمكىن.
«مىسالى، گەستاتسيالىق قانت ديابەتى، گيپەرتونيا، ولار ۇرىق ءۇشىن وتە قاۋىپتى. بۇل شەشىمدى قابىلداۋ ءۇشىن مەديتسينالىق كەڭەس بەرۋ، پسيحولوگيالىق دايىندىق جانە الەۋمەتتىك قولداۋ ماڭىزدى. قورىتا ايتقاندا، «40 جاستان كەيىن بوسانۋعا بولا ما» دەگەن سۇراق كوپتەگەن فاكتورلارعا بايلانىستى جانە ونىڭ شەشىمى ويلاستىرىلعان، جەكە جانە سانالى تۇردە بولۋى كەرەك»، - دەپ اتاپ ءوتتى دارىگەر.
ول، سونداي-اق، 40 جاستان كەيىن انا بولعان ايەلدەردىڭ ەموتسيونالدى جەتىلۋى، تۇراقتىلىعى جانە تاجىريبەسى جوعارى بولاتىنىن اتاپ ءوتتى. بۇل بالا تاربيەسىنە وڭ اسەر ەتپەك.
دارىگەر زاماناۋي ادىستەر مەن تەحنولوگيالار كوپتەگەن ايەلدەرگە ۇلكەن جاستا دەنى ساۋ بالا تۋۋعا مۇمكىندىك بەرەتىنىن ايتتى.
«قازىرگى زامانعى مەديتسينانىڭ باستى ارتىقشىلىقتارىنىڭ ءبىرى - جۇكتىلىكتىڭ ەرتە كەزەڭدەرىندە دە ۇرىقتىڭ مۇمكىن بولاتىن اۋىتقۋلارى مەن اۋرۋلارىن انىقتاۋعا مۇمكىندىك بەرەتىن سكرينينگتىك سىناقتار مەن تەكسەرۋلەر جۇرگىزۋ مۇمكىندىگى. بۇل تاۋەكەلدى ايتارلىقتاي ازايتادى جانە ايەلدەرگە سانالى شەشىم قابىلداۋعا مۇمكىندىك بەرەدى»، - دەدى الفيا گاللياموۆا.
اۆتور
دۋمان ارعىنگەلدى
