جاستار اراسىنداعى جۇمىسسىزدىق ماسەلەسى قالاي شەشىلىپ جاتىر

استانا. KAZINFORM - جىلدا ەڭبەك نارىعىنا 250 مىڭعا تارتا جاس مامان كەلەدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترىلىگى ءمالىم ەتتى.

«قازاقستاندا حالىقتىڭ 27 پايىزىن جاستار قۇراپ وتىر (5,3 ميلليون ادام). جىل سايىن ەڭبەك نارىعىنا شامامەن 200-250 مىڭ جاس مامان شىعادى. كاسىبي ءبىلىمى بولعانىنا قاراماستان، ولاردىڭ بارلىعى بىردەي ماماندىقتارى بويىنشا جۇمىس تابا بەرمەيدى نەمەسە جەتكىلىكتى جۇمىس تاجىريبەسى جوق. بۇل جاعداي ولاردىڭ جۇمىسقا ورنالاسۋىن قيىنداتادى. ءبىز جاستاردىڭ يكەمدى جۇمىس تۇرلەرىنە ۇمتىلىسىن بايقايمىز. جاستاردىڭ جالدامالى جۇمىستاعى ۇلەسى تومەندەپ، سايكەسىنشە فريلانسەرلەر سانى وسۋدە، ولاردىڭ ىشىندە جوعارى ءبىلىمى بارلار دا بار. ءبىرىنشى مىندەت - كاسىبي باعدار بەرۋ جۇمىسى. ءبىز «مانساپ كومپاسى» جوباسىن ىسكە اسىردىق، ول مانساپ جولىن قۇرۋعا، بوس جۇمىس ورىندارىن تەز تابۋعا، جالاقىلار مەن تالاپتاردى سالىستىرۋعا، سونداي-اق سۇرانىسى بار ماماندىقتار، بولجامدار جانە وقۋ ورىندارى تۋرالى اقپارات الۋعا كومەكتەسەدى»، - دەلىنگەن ەڭبەك مينيسترلىگىنىڭ Kazinform اگەنتتىگىنە بەرگەن جاۋابىندا.

ۆەدومستۆو اقپاراتىنا قاراعاندا، ستۋدەنتتەردىڭ ماماندىق بويىنشا تاجىريبەسىن شىڭداۋ ءۇشىن ەلەكتروندىق ەڭبەك بيرجاسىندا وندىرىستىك پراكتيكا فۋنكتسيونالى ىسكە قوسىلدى، ول ناقتى باعىتتاردى مەڭگەرۋگە جانە باسەكەگە قابىلەتتىلىكتى ارتتىرۋعا كومەكتەسەدى.

«جاستار جۇمىسسىزدىعى ماسەلەسىن شەشۋ ءۇشىن قازاقستاندا جۇمىسقا ورنالاستىرۋدىڭ بەلسەندى ءىس-شارالارى دا جۇزەگە اسىرىلىپ جاتىر. 2024 -جىلعى 1-قازانىنداعى جاعداي بويىنشا ايماقتىق جۇمىسپەن قامتۋ ورگانى سانالاتىن مانساپ ورتالىقتارىنا 376 مىڭ ادام جۇگىندى، ولاردىڭ 226 مىڭى ءتۇرلى مەملەكەتتىك قولداۋ تۇرلەرىن الدى (ونىڭ ىشىندە جاستاردىڭ ۇلەسى - 180 مىڭ ادام). جۇمىس بەرۋشىلەردىڭ سۇرانىسى بويىنشا وقۋ ۇيىمدارىندا كاسىبي وقىتۋ اياسىندا 2,6 مىڭ ادام وقۋدان ءوتتى، ولاردىڭ 1,5 مىڭى وقۋدى اياقتاپ، 1,2 مىڭى جۇمىسقا ورنالاستىرىلدى. سونىمەن قاتار، ەڭبەك رەسۋرستارىن دامىتۋدا بۇكىل حالىق ءۇشىن وقىتۋدىڭ سيفرلىق نىساندارىنا باسا نازار اۋدارىلدى. 2021 -جىلدىڭ شىلدەسىنەن باستاپ ەڭبەك نارىعىندا سۇرانىسى بار باعىتتار بويىنشا ونلاين رەجيمدە قىسقا مەرزىمدى وقىتۋدىڭ ءبىرىڭعاي پورتالى ىسكە قوسىلدى (https://skills.enbek.kz)»، - دەپ اتالىپ وتكەن مينيسترلىك اقپاراتىندا.

Skills.Enbek پلاتفورماسىندا - ت ج ك ب ۇيىمدارى مەن جوعارى وقۋ ورىندارىنا ميكروكۆاليفيكاتسيالاردى تانۋ جانە WorldSkills الاڭدارىن دامىتۋ ءۇشىن كۋرستاردى ورنالاستىرۋ مۇمكىندىگى بەرىلىپ وتىر.

«قازىر بۇل پورتالدا 364 داعدى بويىنشا 141 اۆتوردان 615 ونلاين كۋرس ورنالاستىرىلعان، ونىڭ 278 ى حالىق ءۇشىن تەگىن. ودان بولەك، جۇمىس بەرۋشىلەردىڭ جۇمىس ورنىندا كاسىبي وقىتۋىنا 653 ادام قاتىستى، وقۋدى اياقتاعاننان كەيىن 385 ادام جۇمىسقا ورنالاستىرىلدى. 3,5 مىڭ جاس ءوز بيزنەسىن دامىتۋ ءۇشىن گرانت الدى. جۇمىسپەن قامتۋعا جاردەمدەسۋ ارقىلى 106 مىڭ ادام جۇمىس تاۋىپ، بوس جۇمىس ورىندارىنا ورنالاستى. الەۋمەتتىك جۇمىس ورىندارى باعدارلامالارىنا 5 مىڭ ادام، جاستار پراكتيكاسىنا - 1,8 مىڭ ادام، قوعامدىق جۇمىستارعا - 27 مىڭ ادام قاتىستى. بۇل ءىس-شارالار جاستارعا العاشقى جۇمىس تاجىريبەسىن الۋعا جانە ەڭبەك نارىعىنا بەيىمدەلۋگە كومەكتەسەدى، ولاردىڭ ەل ەكونوميكاسىنا ينتەگراتسيالانۋىنا ىقپال ەتەدى»، - دەلىنگەن مينيسترلىك حابارلاماسىندا.

بۇلان بۇرىن حابارلانعانداي، ەڭبەك جانە حالىقتى الەۋمەتتىك قورعاۋ مينيسترىلىگى بيىل شامامەن 1 ميلليون ادامدى جۇمىسقا ورنالاستىرۋ مىندەتى قانشالىقتى ورىندالىپ جاتقانى جايىندا تۇسىنىك بەردى.

اۆتور
رۋسلان عابباسوۆ