جاساندى ينتەللەكتى قازىرگى زاماننىڭ مىقتى قۇرالى، ءتىپتى، قارۋى - پرەزيدەنت
استانا. KAZINFORM - قاسىم-جومارت توقايەۆ جاساندى ينتەللەكتىنى جاۋاپكەرشىلىكپەن قولدانۋ مادەنيەتىن ىلگەرىلەتۋدىڭ ماڭىزى زور ەكەنىن ايتتى، دەپ جازادى اقوردا.
- جاساندى ينتەللەكت - جاھاندىق قۇبىلىس. ەشبىر مەملەكەت ونىڭ الەۋەتىن جالعىز ءوزى تولىق پايدالانا المايدى. بىزگە حالىقارالىق دەڭگەيدەگى ءبىلىم الماسۋ، بىرلەسكەن زەرتتەۋلەر، ينۆەستيتسيالار قاجەت. تەحنولوگيالىق ىنتىماقتاستىق پەن كادرلىق الەۋەتتى دامىتقان ءجون. قازاقستان جاساندى ينتەللەكتىنى بەيبىت ماقساتتا، قاۋىپسىز ءارى جاۋاپكەرشىلىكپەن ىلگەرىلەتۋدى دايەكتى تۇردە قولدايدى. تەحنولوگيا ادامعا قىزمەت ەتىپ، وركەنيەتتىڭ كاتاليزاتورى بولۋى كەرەك. ءبىز وسى ۇستانىمنان اينىمايمىز. جاساندى ينتەللەكت جىككە بولمەۋى قاجەت. تەحنولوگيالىق كەدەرگىلەر ەلدەردىڭ اراسىن الشاقتاتىپ، دامۋىمىزدى باياۋلاتادى. سوندىقتان بۇگىندە عىلىمي- تەحنيكالىق ىنتىماقتاستىقتىڭ قالىپتاسقان ارنالارىن ساقتاۋ وتە وزەكتى. حالىقارالىق ىقپالداستىققا قاتىستى كوزقاراسىمىز ۇلتتىق مۇددەلەردى قۇرمەتتەۋ جانە تەحنولوگيانى بەيبىت ماقساتتا قولدانۋ قاعيداسىنا نەگىزدەلەدى، - دەدى مەملەكەت باسشىسى.
پرەزيدەنت جاساندى ينتەللەكتىنىڭ مۇمكىندىگى مولايا تۇسكەن سايىن، ونىڭ ءقاۋپى دە ارتادى دەپ پايىمدايدى.
- كيبەرقاۋىپسىزدىك، دەرەكتەردى قورعاۋ، اقپاراتتىڭ سەنىمدىلىگى، الگوريتمدەردىڭ اشىقتىعى، قابىلداناتىن شەشىمدەر ءۇشىن جاۋاپكەرشىلىك - مۇنىڭ ءبارى كەزەك كۇتتىرمەي قارالۋعا ءتيىس ماسەلەلەر. شىن مانىندە، جاساندى ينتەللەكتىنى قازىرگى زاماننىڭ مىقتى قۇرالى، ءتىپتى، قارۋى دەپ تە ايتۋعا بولادى. سوندىقتان ونىڭ الەمدىك دامۋعا پايدا نەمەسە زيان اكەلۋى ەڭ الدىمەن ادامزاتقا تىكەلەي بايلانىستى بولماق، - دەدى قاسىم-جومارت توقايەۆ.
