جاس وتباسىلارعا جاڭا مۇمكىندىك: ەكىنشى بالا تۋعان جاعدايدا نەسيە تولىق كەشىرىلەدى

بۇل باستاما وتباسى قۇندىلىقتارىن نىعايتىپ، دەموگرافيانى قولداۋعا باعىتتالعان.

جاس وتباسىلارعا قولداۋ

تۇركيا پرەزيدەنتى رەجەپ تايىپ ەردوعان بۇل شەشىمدى ۇكىمەت وتىرىسىنان كەيىن جاريالاپ، جاستاردى قولداۋ مەملەكەتتىڭ باستى باسىمدىقتارىنىڭ ءبىرى ەكەنىن ايتتى.

وتباسى جانە جاستار قورى ارقىلى شاڭىراق كوتەرگىسى كەلەتىن جاستارعا 200-250 مىڭ ليرا كولەمىندە قولداۋ كورسەتىپ كەلەمىز، - دەدى ول.

ونىڭ ايتۋىنشا، بۇل قارجى جاس وتباسىلاردىڭ العاشقى قاجەتتىلىكتەرىن شەشۋگە باعىتتالعان جانە ولاردىڭ ءوز ءومىرىن سەنىمدى باستاۋىنا مۇمكىندىك بەرەدى.

ءبىرىنشى بالاعا بەرىلەتىن جەڭىلدىك ساقتالادى

باعدارلاما اياسىندا بۇرىن ەنگىزىلگەن جەڭىلدىكتەر دە ساقتالىپ وتىر. ەگەر جاس وتباسى نەسيە العاننان كەيىن العاشقى بالاسىن دۇنيەگە اكەلسە، مەملەكەت ءبىر جىلدىق تولەمدى ءوز موينىنا الادى.

ءبىرىنشى بالاسى دۇنيەگە كەلگەن جاس وتباسىلارعا 12 ايلىق تولەمدى مەملەكەت تاراپىنان وتەپ، قالعان تولەمدەردى 12 ايعا كەيىنگە شەگەرۋ تۋرالى شەشىم قابىلداعان ەدىك، - دەدى تۇركيا پرەزيدەنتى.

بۇل جاس اتا-انالارعا قارجىلىق جۇكتەمەنى ازايتىپ، بالا تاربيەسىنە الاڭسىز كوڭىل بولۋگە مۇمكىندىك بەرەدى.

ەكىنشى بالا دۇنيەگە كەلسە، قارىز كەشىرىلەدى

جاڭا وزگەرىسكە سايكەس، ەكىنشى بالا دۇنيەگە كەلگەن جاعدايدا نەسيە تولىق كەشىرىلەدى.

ەندى بۇل قولداۋ ودان ءارى كۇشەيتىلەدى. ەگەر وتباسىندا ەكىنشى بالا دۇنيەگە كەلسە، قالعان نەسيەنى تولىقتاي مەملەكەت وتەيتىن بولادى، - دەدى تۇركيا پرەزيدەنتى.

بۇل شەشىم قوعامدا ۇلكەن قولداۋعا يە بولىپ وتىر. سەبەبى مۇنداي كومەك جاس وتباسىلار ءۇشىن ۇلكەن جەڭىلدىك سانالادى.

الەۋمەتتىك ساياساتتاعى جاڭا كەزەڭ

پرەزيدەنتتىڭ ايتۋىنشا، بۇل باستاما تەك ەكونوميكالىق كومەك ەمەس، ەلدىڭ بولاشاعىنا باعىتتالعان ستراتەگيالىق قادام.

جاس وتباسىلارعا جاعداي جاساۋ - ءبىزدىڭ كەلەشەگىمىزگە سالىنعان ينۆەستيتسيا. ءبىز جاستاردىڭ سەنىممەن ءومىر ءسۇرۋى ءۇشىن بارلىق مۇمكىندىكتى جاساي بەرەمىز، - دەدى تۇركيا پرەزيدەنتى.

el.kz