جانىبەك ءالىمحان ۇلى سەنساتسيا جاساپ، الەمدىك رەيتينگتە كانەلو مەن بيۆولدى باسىپ وزدى

جاڭارتىلعان رەيتينگتە ول بەسىنشى ورىنعا تۇراقتاپ، الەمدىك بوكستىڭ ەليتاسىنداعى ورنىن ساقتاپ قالدى. ءالىمحان ۇلى بۇل تىزىمدە اتاقتى بوكسشىلار - دميتري بيۆول مەن ساۋل «كانەلو» الۆارەستەن دە جوعارى تۇر.

ايتا كەتەيىك، سوڭعى ۋاقىتتا قازاقستاندىق بوكسشى دوپينگ داۋىنا بايلانىستى نازارعا ىلىكتى. مەلدونيگە تاپسىرعان سىناماسى وڭ ناتيجە كورسەتكەن سوڭ، ول 2026-جىلدىڭ 2-جەلتوقسانىنا دەيىن جەكپە-جەكتەردەن شەتتەتىلدى. وسىعان بايلانىستى IBF ۇيىمى ونى چەمپيوندىق بەلبەۋدەن ايىرىپ، رەيتينگتەن شىعاردى. ال WBO تۇجىرىمى بويىنشا چەمپيوندىق اتاعى ازىرگە ءالىمحان ۇلىنىڭ ەنشىسىندە قالىپ وتىر.

جانىبەك سوڭعى جەكپە-جەگىن 2025-جىلدىڭ 5-ساۋىرىندە وتكىزىپ، فرانسيالىق اناۋەل نگاميسسەنگەنى بەسىنشى راۋندتا تەحنيكالىق نوكاۋتپەن جەڭگەن ەدى. سول كەزدەسۋدە ول WBO جانە IBF تۇجىرىمدارى بويىنشا چەمپيوندىق بەلبەۋلەرىن ءساتتى قورعادى.

Boxing Metrics نۇسقاسى بويىنشا تولىق P4P رەيتينگى:

ناويا ينوۋە (32-0) - 0.990

الەكساندر ۋسيك (24-0) - 0.952

تەرەنس كروۋفورد (42-0) - 0.940

شاكۋر ستيۆەنسون (25-0) - 0.936

جانىبەك ءالىمحان ۇلى (17-0) - 0.929

دميتري بيۆول (24-1) - 0.927

دجاي وپەتايا (30-0) - 0.924

ساۋل «كانەلو» الۆارەس (63-3-2) - 0.924

دجەسسي رودريگەس (23-0) - 0.897

داۆيد بەناۆيدەس (31-0) - 0.889