جانقوش تۇراروۆقا قاتىستى قىلمىستىق ءىس قايتا قوزعالدى

استانا. قازاقپارات - بۇل تۋرالى ءانارۋ قۇرمانالىنىڭ ادۆوكاتى ءلاززات احاتوۆا حابارلادى. ءبىراق جابىرلەنۋشى تاراپ الدىڭعى ءىستىڭ قىسقارتىلعانى تۋرالى زاڭسىز شىعارىلعان قاۋلىنى جارتى اي ۋاقىت وتسە دە ءالى الماعان، دەپ حابارلايدى turkystan.kz.

«باس پروكۋراتۋراعا جازىلعان شاعىمنىڭ، الەۋمەتتىك جەلىدەگى، ب ا ق-عى جاريالىلىقتىڭ ناتيجەسى شىعار. سوڭعى كەزدە ارىپتەستەرىمنەن، حالىقتان باس پروكۋراتۋرا قىزمەتكەرلەرىنىڭ جاقسى جۇمىس ىستەپ، كوپتەگەن قىلمىس پەن زاڭبۇزۋشىلىقتاردى اشۋعا سەپتىگىن تيگىزىپ جاتقاندارىن ەستيمىن. بۇل دا بولسا، كوڭىلگە جاعاتىن، ۇزىلگەن ءۇمىتتى جالعايتىن جاعىمدى نارسە عوي. تەك جامان جاعىن ايتا بەرمەي، جاقسى جاعىن دا ايتايىق. سوندا دا قايتادان «كرىشالارىن»، دەپۋتات اعالارىن قوسىپ، قىلمىسىن جابۋعا تاعى كۇش سالا ما دەگەن كۇدىك جوق ەمەس. ءبىزدىڭ ەلدىڭ ورگاندارىن، زاڭىنىڭ قالاي جۇمىس ىستەيتىنىن بىلگەسىن، «جامان ايتپاي، جاقسى جوق» دەگەندەي، ونداي كۇدىكتىڭ بولۋى دا زاڭدىلىق»، - دەپ جازدى ول.