جامبىلدا «اسار» جوباسىمەن كوپبالالى جانە از قامتىلعان وتباسىلار باسپانا الۋدا

  جامبىل وبلىسىندا 37 مىڭنان استام ادام باسپانا الۋ كەزەگىندە تۇر. بۇل تۋرالى ءوڭىر اكىمى ەربول قاراشوكەيەۆ ەلورداداعى ەسەپتىك بريفينگىندە ايتتى، دەپ حابارلايدى Kazinform.

«جىل باسىنان بەرى 558 مىڭ شارشى مەتر تۇرعىن ءۇي پايدالانۋعا بەرىلدى. تۇرعىن ءۇي الۋعا كەزەكتە 37,6 مىڭ ادام تۇر، ونىڭ 16,3 مىڭى - حالىقتىڭ الەۋمەتتىك وسال توپتارى. قازىر 74 تۇرعىن ءۇيدىڭ قۇرىلىسى جۇرگىزىلۋدە، ونىڭ 35 ءىن جىل سوڭىنا دەيىن اياقتاۋ جوسپارلانۋدا»، - دەدى ە. قاراشوكەيەۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، جىل باسىنان بيۋدجەت قاراجاتى ەسەبىنەن 10 ءۇي جانە جەكە ينۆەستيتسيالار ەسەبىنەن 11 ءۇي تاپسىرىلدى.

جىل سوڭىنا دەيىن 882 ميلليون تەڭگەگە جاڭا تۇرعىن الاپتارىنىڭ 869 ۋچاسكەسىنە ينجەنەرلىك ينفراقۇرىلىم تارتىلادى.

«بيىل حالىقتىڭ الەۋمەتتىك وسال توپتارى مەن كوپبالالى وتباسىلار ءۇشىن 7,6 ميلليارد تەڭگەگە 797 پاتەر ساتىپ الۋدى جوسپارلاپ وتىرمىز. بۇگىنگە 123 پاتەر ساتىپ الىندى. «اسار» باستاماشىلىق جوباسى اياسىندا 49 كوپبالالى جانە از قامتىلعان وتباسىلار باسپانامەن قامتىلدى»، - دەيدى ە. قاراشوكەيەۆ.

اكىمدىكتىڭ حابارلاۋىنشا، جەرگىلىكتى كاسىپكەرلەردىڭ دەمەۋشىلىك قولداۋىمەن 2020 -جىلدان باستاپ 338 از قامتىلعان وتباسى باسپانا العان.