جامبىلدا اكىمدەر ءالى بىتپەگەن جۇمىستارعا قارجى اۋدارىپ جىبەرگەن

تاراز. KAZINFORM - جامبىل وبلىسىنداعى ادەپ جونىندەگى كەڭەس وتىرىسىندا ءۇش اۋىل اكىمىنىڭ ءتارتىبى قارالدى.

وسى جىلدىڭ ساۋىرىندە مەركى اۋدانى اقتوعان اۋىلدىق وكرۋگى اكىمى اپپاراتى مەن «مەركى جولدارى» ج ش س اراسىندا وسى وكرۋگتەگى 5 كوشەنى ورتا جوندەۋدەن وتكىزۋ جۇمىستارى بويىنشا 232 ميلليون تەڭگەگە اشىق كونكۋرس تاسىلىمەن كەلىسىم-شارت جاسالعان.

ماۋسىم ايىندا اقتوعان اۋىلدىق وكرۋگىنىڭ اكىمى ورىندالعان جۇمىستار ءۇشىن 111 ميلليونان استام تەڭگەنى مەردىگەردىڭ ەسەپشوتىنا اۋدارادى. الايدا كەيىننەن ساراپشى 48 ميلليوننان استام تەڭگەگە قۇم- شاعال توسەۋ جانە تاعى باسقا جۇمىستاردىڭ اتقارىلماعانىن انىقتاعان.

ال، سارىمولدايەۆ اۋىلدىق وكرۋگى اكىمى اپپاراتى «بايباتىر 01» ج ش س- مەن جىلىسبايەۆ كوشەسىن ورتا جوندەۋدەن وتكىزۋ جۇمىستارى بويىنشا جالپى قۇنى 15 ميلليون تەڭگەگە ءبىر كوزدەن ساتىپ الۋ تاسىلىمەن كەلىسىمشارت جاساعان. ءبىراق ورىندالعان جۇمىستار تۋرالى اكتى بەرىلمەستەن، مەردىگەرگە قۇبىرلاردى مونتاجداۋ جۇمىستارىنا 6039687 تەڭگە كولەمىندەگى بيۋدجەت قاراجاتىن اۋدارعانىمەن تالداۋ بارىسىندا 3,6 ميلليونعا جۋىق تەڭگەنىڭ جۇمىستارى ورىندالماعانى بەلگىلى بولدى.

سونداي-اق، وسى اۋىلدىق وكرۋگ «قازاق جولى 2050» ج ش س-مەن راشۋپكين كوشەسىنىڭ 8 بۇرىلىسىن ورتاشا جوندەۋ ءۇشىن 46574713 تەڭگەگە كەلىسىمشارتقا وتىرادى. الايدا سالا ماماندارى اسفالت جابىندىسىنىڭ ساپاسى ءتيىستى تالاپتارعا سايكەس كەلمەيتىنىن، ياعني جولدىڭ تەگىس ەمەستىگى جانە ءار جەرلەردە شۇڭقىرلاردىڭ بار ەكەنىن انىقتاعان.

وسىنداي كەمشىلىكتەر بولا تۇرا اۋىل اكىمى قاراجاتتى تولىعىمەن اۋدارىپ جىبەرگەن.

جانە اقەرمەن اۋىلدىق وكرۋگى اكىمى اپپاراتى مەن «Alaman Story Group KZ» ج ش س اراسىندا 12 اۆتوموبيل جولدارىن ورتا جوندەۋدەن وتكىزۋ بويىنشا جالپى قۇنى 187,5 ميلليون تەڭگەگە كەلىسىمشارت جاسالىپ، وكرۋگ اكىمى مەردىگەردىڭ ەسەپشوتىنا قاراجات اۋدارعان.

الايدا سىبايلاس جەمقورلىققا قارسى قىزمەتپەن تارتىلعان ساراپشى تالداۋ بارىسىندا جالپى 18,7 ميلليون تەڭگەنىڭ ورىندالماعان جۇمىستارىن انىقتادى.

اتالعان فاكتىلەر بويىنشا قوزعالعان تارتىپتىك ىستەر قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ جامبىل وبلىسىنداعى ادەپ جونىندەگى كەڭەسى وتىرىسىندا قارالىپ، ءتيىستى اۋىل اكىمدەرىنە «قىزمەتتەرىنە تولىق سايكەس ەمەستىگى تۋرالى ەسكەرتۋ» تۇرىندەگى تارتىپتىك جازا قولدانۋ ۇسىنىلدى.

اۆتور
ورالحان ءداۋىت