جامبىل پوليتسەيلەرى لەدي اتتى ءيت تۋرالى دەتەكتيۆ فيلم ءتۇسىردى
تاراز. قازاقپارات – 23-ماۋسىم - قازاقستان پوليتسياسى كۇنى مەرەكەسىنە وراي، وبلىستىق پوليتسيا دەپارتامەنتىنىڭ باستاماسىمەن «لەدي» اتتى فيلم ءتۇسىرىلدى. فيلمدەگى وقيعالار شىنايى وقيعاعا نەگىزدەلگەن.
جامبىل وبلىستىق پوليتسيا دەپارتامەنتىنىڭ كينولوگيالىق قىزمەتى ورتالىعىندا لەدي دەگەن لاقاپ اتپەن بەلگىلى ءتورت جاسار بەلگيالىق وۆچاركا تۇقىمداس ءيت بار. ول كىشى ينسپەكتور-كينولوگ نۇربول تورەبەككە بەكىتىلگەن.
لەدي - قاۋىپتى قىلمىسكەرلەردى ۇستاۋعا ماماندانعان، شابۋىلداۋشى ءيت. ول سونداي-اق، جارىلعىش زاتتار مەن قۇرىلعىلاردى تابۋعا دا ارنايى ۇيرەتىلگەن.
دەپارتامەنتتىڭ باسپا ءسوز حاتشىسى گۇلسارا مۇحتارقۇلوۆانىڭ ايتۋىنشا، جامبىل وبلىسىنىڭ پ د كينولوگيالىق قىزمەتى ورتالىعىندا بولعان كەزەڭدە لەديدىڭ كومەگىمەن توناۋ، قاراقشىلىق شابۋىلدار، كىسى ءولتىرۋ سەكىلدى 80 نەن استام قىلمىس اشىلىپ، قاۋىپتى قىلمىسكەرلەر قۇرىقتالعان.
- كۇماندى زاتتاردى تابۋ بويىنشا شاقىرتۋ تۇسكەن كەزدە ءبىرىنشى كەزەكتە ينسپەكتور-كينولوگ يتپەن جانە ساپەرلەرمەن بىرگە سول جەرگە بارادى. ماسەلەن، 29-مامىردا پوليتسياعا كوشەگە قالدىرىپ كەتكەن يەسىز سومكەلەردى تابۋ تۋرالى 2 شاقىرتۋ ءتۇستى. ءبىزدىڭ لەدي ەكى جەرگە دە باردى. جارىلعىش قۇرىلعىلاردى تاپپاعان ءيت، پوليتسەيگە بەلگى بەردى. ولار سودان كەيىن عانا سومكەلەردى اشتى، - دەيدى جامبىل وبلىسىنىڭ پ د كينولوگيالىق قىزمەت ورتالىعىنىڭ باستىعى يۋري ناليۆكين.
لەدي 2021-جىلى بايزاق اۋدانىنداعى بولعان جارىلىس كەزىندە دە جارىلعىش زاتتاردى ىزدەۋگە قاتىسقان. وسى جىلدار ىشىندە ول ءوزىن تەك كاسىبي، سەنىمدى سەرىك رەتىندە كورسەتكەن.
قىلمىسكەرلەردەن قورىقپايتىن قىزمەتتىك ءيت كينولوگيالىق قىزمەت ورتالىعىندا ءجيى قوناق بولاتىن، كانيستەراپيا قاجەت ەتەتىن ەرەكشە بالالارعا مەيىرىمدىلىك تانىتادى. يۋري ناليۆكين لەدي بالالارعا ارنالعان قويىلىمدارعا دا قاتىسادى، شابۋىلداۋ مەن ىزدەۋ داعدىلارىن كورسەتۋدى جاقسى كورەتىنىن ايتادى.
جالپى، جامبىل وبلىسىنداعى پوليتسەيلەر ەلىمىزدە العاشقىلاردىڭ ءبىرى بولىپ قىزمەتتىك يتتەرگە قارىم-قاتىناس ادىستەرىن ارنايى ۇيرەتىپ، بالالارعا «دارىگەر» رەتىندە پايدالانا باستاعانىن اتاپ وتكەن ءجون.
زاماناۋي تەحنولوگيالاردىڭ ۇزدىكسىز دامۋىنا قاراماستان، زاڭسىز زاتتاردى ىزدەۋدەگى، قىلمىسكەرلەردى ۇستاۋداعى جانە قىلمىستاردى اشۋداعى قىزمەتتىك يتتەردىڭ ءرولى كۇن سايىن ارتىپ كەلە جاتقانىن پوليتسەيلەر باسا ايتۋدا.
