جامبىل وبلىسىنان 23 مىڭ جىل بۇرىنعى جادىگەر تابىلدى

Жамбыл
Фото: Сарысу ауданы әкімінің баспасөз қызметі

تاراز. KAZINFORM - جامبىل وبلىسى سارىسۋ اۋدانىنداعى العاشقى ادامداردىڭ تۇراعى - «اقتوعاي» ۇڭگىرىندە تاريح عىلىمدارىنىڭ دوكتورى، ۇلتتىق مۋزەيدىڭ باس عىلىمي قىزمەتكەرى، اكادەميك جاكەن تايماعانبەتوۆتىڭ جەتەكشىلىگىمەن حالىقارالىق بىرلەسكەن ارحەولوگيالىق ەكسپەديتسيا ارحەولوگيالىق عىلىمي-زەرتتەۋ جۇمىستارىن جۇرگىزىپ جاتىر.

ەكسپەديتسيا قۇرامىندا ۇلتتىق مۋزەيدىڭ، نازاربايەۆ ۋنيۆەرسيتەتىنىڭ، ا ق ش- تىڭ نيۋ-يورك ۋنيۆەرسيتەتىنىڭ عالىمدارى جانە باسقا دا ماماندار بار.

«زەرتتەۋ جۇمىستارى بارىسىندا «اقتوعاي» ۇڭگىرىنەن 23 مىڭ جىل بۇرىنعى بۇيىمدار تابىلدى. مۇنداعى تاستىڭ سىنىقتارى، ۇساق مالدىڭ سۇيەكتەرى، تاۋتەكەنىڭ ومىرتقالارى تاس داۋىرىنە ءتان. ءبىراز سۇيەكتەردىڭ ازىرگە قانداي جانۋار نەمەسە اڭعا ءتان ەكەنى بەلگىسىز. ول ارنايى زەرتتەۋ ناتيجەسىندە عانا بەلگىلى بولادى»، - دەيدى جاكەن تايماعامبەتوۆ.

جالپى، حالىقارالىق ەكسپەديتسيانىڭ باستالعانىنا 10 كۇن بولدى. بيىل مۇندا نيۋ-يورك ۋنيۆەرسيتەتىنىڭ ستۋدەنتتەرى، دوكتورانتتارى دا كەلىپ، تاجىريبەدەن ءوتىپ جاتىر. الداعى ۋاقىتتا اشىق اسپان استىنداعى مۋزەي بولۋى دا مۇمكىن.

«بۇگىنگى قازبا جۇمىستارىنان شىققان ماتەريالدار العاشقى ادامدار شىن مانىندە وسىندا ءومىر سۇرگەنىن كورسەتىپ وتىر. مۇندا سۇيەك قالدىقتارى، ەڭبەك قۇرالدارى، جاققان وتتىڭ ورىندارى، بارلىعى ايقىن كورىندى. بۇل عىلىمي جۇمىستار بۇدان دا تەرەڭ جۇرگىزىلۋى قاجەت ەكەندىگىن كورسەتەدى. ول ءۇشىن ءالى دە 10 جىلداي ۋاقىت كەرەك»، - دەيدى «تاريحي-مادەني ەسكەرتكىشتەر قورىعى جانە قالپىنا كەلتىرۋ ديرەكتسياسىنىڭ» ديرەكتورى قۋانىش داۋىربەكوۆ.

«اقتوعاي» ۇڭگىرى جەر دەڭگەيىنەن شامامەن 60 مەتر بيىكتىكتە ورنالاسقان. عالىمداردىڭ زەرتتەۋى بويىنشا جالپى قاراتاۋ تاۋ جۇيەسىندە بارلىعى 95 ۇڭگىر انىقتالعان. ال حالىقارالىق بىرلەسكەن ارحەولوگيالىق ەكسپەديتسيانىڭ عىلىمي زەرتتەۋ جۇمىستارى ءالى دە جالعاسادى.

سوڭعى جاڭالىقتار