جاعىمسىز سۋرەتتەر ءبىر ىسكە دەن قويۋ قابىلەتىنە كەرى اسەر ەتەدى - زەرتتەۋ
ەموتسيالىق تۇرعىدا جاعىمسىز سۋرەتتەر ادامنىڭ ۇزاق ۋاقىت بويى ءبىر ىسكە دەن قويۋ قابىلەتىنە كەرى اسەر ەتەدى. بۇل تۇجىرىم Behavior Research Methods جۋرنالىندا جاريالانعان جاڭا زەرتتەۋدە دالەلدەندى. عالىمدار جاعىمسىز ۆيزۋالدى تىتىركەندىرگىشتەردىڭ (مىسالى، ۇرەي تۋدىرعان جانۋارلار نەمەسە قايعىعا باتقان ادامداردىڭ سۋرەتتەرى) ادامنىڭ نازارىن بەيتاراپ نەمەسە جاعىمدى بەينەلەرگە قاراعاندا الدەقايدا قاتتى بۇزاتىنىن انىقتادى.
زەرتتەۋدە عالىمدار جاڭا ەكسپەريمەنتتىك ءادىس - emogradCPT تاپسىرماسىن قولداندى. بۇل - سيفرلارعا نەگىزدەلگەن زەيىن تاپسىرماسى، ونىڭ ارتقى فونىندا ءتۇرلى ەموتسيونالدى بەينەلەر كورسەتىلەدى. زەرتتەۋشىلەر وسى ءادىس ارقىلى جاعىمسىز ۆيزۋالدى مازمۇننىڭ ادامنىڭ شوعىرلانۋ قابىلەتىنە قالاي اسەر ەتەتىنىن زەرتتەدى.
زەرتتەۋ اۆتورى، بوستونداعى جەتەكشى عىلىمي قىزمەتكەرى مايكل ەستەرماننىڭ ايتۋىنشا، بۇل زەرتتەۋ ەموتسيالىق سىرتقى فاكتورلاردىڭ زەيىن تۇراقتىلىعىنا اسەرىن زەرتتەۋدە جاڭا بەلەس.
«كۇندەلىكتى ومىردە كوڭىل-كۇيىمىز نەمەسە مازاسىز ويلار نازارىمىزدى بولەتىنى بەلگىلى. الايدا وسىنى زەرتحانادا ولشەۋ قيىن بولاتىن. ءبىز وسى قۇبىلىستى ناقتى باقىلاۋعا مۇمكىندىك بەرەتىن ءادىس ويلاپ تاپتىق»، - دەدى ول.
زەرتتەۋ ناتيجەلەرى بويىنشا، جاعىمسىز بەينەلەر تەك زەيىندى بۇزىپ قويماي، سونىمەن قاتار، كەيىن ولار باسقا بەينەلەرگە قاراعاندا الدەقايدا جاقسى ەستە ساقتالادى جانە نەگاتيۆتى ەموتسيالار تۋعىزادى.
