جابىرلەنۋشىلەر پەريزات قايراتتىڭ اناسىنىڭ جازاسىن جەڭىلدەتۋگە قارسى شىقتى
استانا. KAZINFORM - استانا سوتىندا «Birgemiz» قايىرىمدىلىق قورىنىڭ بۇرىنعى جەتەكشىسى، ۆولونتەر پەريزات قايرات پەن ونىڭ اناسى عايني الاشبايەۆاعا قاتىستى سوت وتىرىسى جالعاسىپ جاتىر. بۇگىن قور ەسەپشوتىنا اقشا اۋدارىپ، قارجىلاي زارداپ شەككەندەردىڭ پىكىرى تىڭدالدى.
ەڭ الدىمەن «Forte Bank» ا ق ماركەتينگ جونىندەگى ديرەكتورى انتون كيم جەكە قاراجاتىنان Birgemiz قورىنا 500 مىڭ تەڭگە اۋدارعانىن، بۇل ءىس بويىنشا بەرىلگەن ازاماتتىق تالاپتى تولىق قولدايتىنىن جەتكىزدى.
- ءبىز ازاماتتاردىڭ ءال-اۋقاتىن ارتتىرۋ، ەكونوميكانى دامىتۋ، زورلىق-زومبىلىقتى جويۋعا باعىتتالعان رەفورمالار تۋرالى جيى ايتامىز. الايدا ءاربىر وسىنداي وقيعا قوعامنىڭ كوپتەگەن وڭ جەتىستىكتەرىن جوققا شىعارىپ وتىرادى. ءبىزدىڭ پوليتسيا، دارىگەرلەر مەن مۇعالىمدەر - سەنىم ارتۋعا بولاتىن تۇلعالار دەپ سەنۋىمىز ماڭىزدى. ال «Birgemiz» قورىنا قاتىستى جاعداي تۇتاس قايىرىمدىلىق سالاسىنا دەگەن سەنىمگە سەلكەۋ ءتۇسىردى. بۇعان دەيىن قايىرىمدىلىق جاساعان نەمەسە ونى جوسپارلاعان ءار ادام ەندى كۇمانمەن قارايتىن بولدى، - دەدى ول سوتتا سويلەگەن سوزىندە.
سونىمەن بىرگە انتون كيم سوتتان عايني الاشبايەۆانىڭ دەنساۋلىعىن ەسكەرىپ، وعان تاعايىندالاتىن جازانى جەڭىلدەتۋدى سۇرادى.
- مەن پ. قايرات پەن ع. الاشبايەۆانىڭ كىناسى تولىق دالەلدەندى دەپ ەسەپتەيمىن. ازاماتتىق تالابىمدى تولىق قاناعاتتاندىرۋدى سۇرايمىن جانە جازاعا قاتىستى پروكۋروردىڭ ۇستانىمىن قولدايمىن. دەگەنمەن الاشبايەۆا حانىمنىڭ جاسى مەن دەنساۋلىق جاعدايىن ەسكەرىپ، جەڭىلدەتەتىن ءمان-جاي رەتىندە نازارعا الۋدى سۇرايمىن، - دەيدى ا. كيم.
دەگەنمەن وزگە جابىرلەنۋشىلەر ع. الاشبايەۆاعا ەش جەڭىلدىك جاساماۋدى سۇراپ وتىر.
- مەنىڭشە، ەڭ قاتاڭ تۇردە جازالاۋ كەرەك. اناسىنىڭ جازاسىن جەڭىلدەتۋدى سۇراپ وتىر، اناسى قايدا قاراعان؟ قىزىن توقتاتۋى كەرەك ەدى. ميللياردتاپ ۇرلىق جاساۋعا قالاي جول بەرگەن، - دەدى جابىرلەنۋشى ءامينا ايماعانبەتوۆا.
تاعى ءبىر جابىرلەنۋشى ر. توماشيەۆ بۇل پىكىردى قولدادى.
- قور تۋرالى مەن تەك ەكونوميكالىق تەرگەۋ قىزمەتىنەن ەستىدىم. سوندىقتان ايىپتاۋ تاراپىن تولىق قولدايمىن، شىعارىلعان شەشىممەن كەلىسەمىن. كوپتەگەن جابىرلەنۋشىلەر (ع. الاشبايەۆانىڭ - رەد.) جاسىنا، دەنساۋلىعىنا بايلانىستى جازاسىن جەڭىلدەتۋدى سۇراپ جاتىر.
مەنىڭ ويىمشا، مۇنداي جاعدايلاردى تۇبەگەيلى توقتاتۋ كەرەك. سوندىقتان شەشىمدى وزگەرىسسىز قالدىرىپ، جاسىن نەمەسە اۋرۋىن سىلتاۋراتپاعان ءجون. ازاماتتىق تالابىمدى قاناعاتتاندىرۋدى سۇرايمىن، - دەدى جابىرلەنۋشى رۋسلان توماشيەۆ.
بۇعان دەيىن پروكۋرورلار پەريزات قايراتقا - 10 جىل باس بوستاندىعىنان ايىرۋ، عاني الاشبايەۆاعا 8 جىل باس بوستاندىعىنان ايىرۋ جازاسىن سۇراعان ەدى.
ەسكە سالا كەتسەك، پەريزات قايرات دايىن ديپلوم ساتىپ العىسى كەلگەن ارەكەتى تۋرالى جازعان ەدىك.
سونداي-اق كۋاگەر پەريزات قايرات قور قارجىسىن قالاي قولما-قول اقشاعا اۋدارعانىن ايتىپ بەردى.
سوت بارىسىندا ايگىلى ءانشى، وتانداسىمىز ديماش قۇدايبەرگەننىڭ ەسىمى اتالدى.
بەلگىلى بولعانداي تاسقىن كەزىندە نازاربايەۆ زياتكەرلىك مەكتەبىنىڭ قىزمەتكەرلەرى 2,9 ميلليون تەڭگە جولداعان.
ءىستى قاراۋ كەزىندە پەريزات قايرات جەتەكشىلىك ەتكەن قورعا قارجى اۋدارعان 47 ادام جابىرلەنۋشى دەپ تانىلدى.
