جاپپاي يممۋنداۋ: قىزىلشاعا قارسى 608 مىڭ قازاقستاندىق ەگىلدى
ەلىمىزدە قىزىلشا ينفەكسياسىنىڭ تارالۋىنا قارسى جاپپاي يممۋنداۋ ءجۇرىپ جاتىر. بۇگىندە قوسىمشا ۆاكسينالاۋعا جاتاتىن 1,5 ميلليون ادامنىڭ 608 مىڭنان استامى ەگىلدى، قامتۋ 40,5 پايىز قۇرادى، دەپ حابارلايدى Kazinform.
دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ مالىمەتىنە سۇيەنسەك، قوسىمشا يممۋنداۋ اياسىندا كۇن سايىن 30 مىڭنان استام ادام ۆاكسينالانادى.
قىزىلشاعا قارسى جوسپارلى ۆاكسينالاۋ دا جالعاسىپ جاتىر. ماسەلەن، جىل سايىن 1 جانە 6 جاستاعى 700 مىڭعا جۋىق بالا ەگىلەدى (د د ۇ ۇسىنعان كەمىندە 87,1 پايىز كەزىندە 1 جاستاعى بالالاردىڭ 94,1 پايىز جانە 6 جاستاعى بالالاردىڭ 93,4 پايىز قامتىلدى).
بۇدان بولەك، ەپيدەميالىق كورسەتكىشتەر بويىنشا ۆاكسيناتسيالاۋ جۇرگىزىلۋدە، بۇرىن ۆاكسيناتسيالاۋدى وتكىزىپ العان جانە ودان باس تارتقان 133,3 مىڭنان استام ادام ەگىلدى.
«قابىلدانعان شارالاردىڭ ارقاسىندا قازىرگى ۋاقىتتا ەلىمىزدىڭ كوپتەگەن وڭىرىندە قوسىمشا يممۋنداۋدىڭ وڭ ديناميكاسى بايقالادى. ماسەلەن، ماڭعىستاۋ، الماتى، اقتوبە، جامبىل، تۇركىستان، اباي، ۇلىتاۋ وبلىستارىندا سوڭعى اپتادا قىزىلشادان قورعاۋ ماقساتىندا بالاسىن ەگۋگە اكەلىپ جاتقان حالىقتىڭ بەلسەندىلىگى ارتتى»، - دەلىنگەن ۆەدومستۆو مالىمەتىندە.
دەنساۋلىق ساقتاۋ مينيسترلىگى قىزىلشاعا قاتىستى ەلدەگى قولايسىز ەپيدەميولوگيالىق احۋالعا بايلانىستى 5 جاسقا دەيىنگى بالالاردى قوسىمشا جاپپاي يممۋنداۋ شەڭبەرىندە ەگۋدى ۇسىنادى. سونداي-اق 5 - 18 جاس ارالىعىنداعى بالالاردا قىزىلشاعا قارسى 2 ەكپە بولماعان جاعدايدا پروفيلاكتيكالىق ەكپە سالۋعا كەڭەس بەرىلىپ وتىر. پروفيلاكتيكالىق ەكپە الۋ ءۇشىن تەك جۇمىس كۇندەرى عانا ەمەس، دەمالىس كۇندەرى دە تىركەلگەن جەرى بويىنشا مەديتسينالىق ۇيىمعا جۇگىنۋگە بولادى.
