جاڭا جىلدا پيروتەحنيكادان قانشا ادام زارداپ شەكتى

جاڭا جىل ءتۇنى ەلىمىزدە پيروتەحينكا بۇيىمدارىنان 16 ادام زارداپ شەكتى، دەپ حابارلايدى Kazinform ق ر دەنساۋلىق ساقتاۋ مينيسترلىگىنە سىلتەمە جاساپ.

«1-قاڭتار كۇنى شىعىس قازاقستان وبلىسىندا 15 جاستاعى جىگىتكە مەديتسينالىق كومەك كورسەتۋ ءۇشىن دارىگەرلەر شاقىرتىلدى. ول كوشەدە پەتاردا تاۋىپ العان جانە قولىندا جارىلىپ، سول الاقانى 10 س م كولەمىندە اشىق جاراقات العان. ءۇش ساۋساعىندا تىرناق پلاستينكاسى جوق، ءتورتىنشى ساۋساعىنىڭ ۇشى جوق، بەتىن تەرميالىق كۇيىك شالعان. ول وسكەمەن قالاسىنىڭ انا مەن بالا ورتالىعىنا جاتقىزىلدى»، - دەپ جازىلعان مينيسترلىكتىڭ رەسمي جاۋابىندا.

جامبىل وبلىسىندا دارىگەرلەر 2 شاقىرۋعا بارعان. ونداعى ەكى ادامنىڭ دا قولىندا پەتاردا جارىلعان جانە ەكەۋى دە اۋرۋحاناعا جاتقىزىلدى.

تۇركىستان وبلىسىندا 1-قاڭتار كۇنى 26 جاستاعى ەر ادامعا مەديتسينالىق كومەك كورسەتىلدى، ول وتشاشۋ جاعامىن دەپ، بىلەگىن جەڭىل جاراقاتتاعان.

الماتى قالاسى بويىنشا 31-جەلتوقسان مەن 1-قاڭتار كۇندەرى 12 ادام پيروتەحنيكادان زارداپ شەككەن، ونىڭ ىشىندە 4 بالا بار. 9 ادام، ونىڭ ىشىندە 3 بالا اۋرۋحاناعا جاتقىزىلعان.

قالعان وڭىرلەردە پيروتەحنيكادان (وتشاشۋدان) زارداپ شەككەن تۇرعىنداردان شاقىرتۋ تۇسپەگەن.

بۇعان دەيىن دەنساۋلىق ساقتاۋ مينيسترلىگى 2023 -جىلدىڭ 30-جەلتوقسانى مەن 2024 -جىلدىڭ 2-قاڭتارى ارالىعىندا جول-كولىك وقيعاسىنان قانشا ادام زارداپ شەككەنىن جاريالاعان ەدى.