جاڭا جىل قارساڭىندا ترانسپلانتولوگ دارىگەرلەر 9 ادامدى امان الىپ قالدى
جاڭا جىل قارساڭىندا دارىگەرلەر تۇرعىندارعا شۇعىل مەديتسينالىق كومەك كورسەتتى، دەپ حابارلايدى Kazinform.
دەنساۋلىق ساقتاۋ مينيسترلىگى باسپا ءسوز قىزمەتىنىڭ مالىمەتىنشە، اۋا رايىنىڭ قولايسىزدىعىنا قاراماستان سانيتاريالىق اۆياتسيا كۇشتەرىنىڭ كومەگىمەن جانە بىرنەشە قىزمەتتىڭ ۇيلەسىمدى جۇمىسىنىڭ ارقاسىندا بىردەن 9 پاتسيەنتكە اعزا ترانسپلانتاتتاۋ وپەراتسياسى جاسالدى.
دەنساۋلىق ساقتاۋ مينيسترلىگىنىڭ، ۇلتتىق شۇعىل مەديتسينانى ۇيلەستىرۋ ورتالىعىنىڭ، ۇلتتىق عىلىمي ونكولوگيا ورتالىعىنىڭ، ۇلتتىق عىلىمي كارديوحيرۋرگيالىق ورتالىقتىڭ، رەسپۋبليكالىق ترانسپلانتاتتاۋدى ۇيلەستىرۋ ورتالىعىنىڭ جانە جوعارى تەحنولوگيالىق مەديتسينالىق قىزمەتىڭ ۇيلەسىمدى ءىس-قيمىلى جاڭا جىل قارساڭىندا ءبىرقاتار وپەراتسيانى ءساتتى جۇرگىزۋگە مۇمكىندىك بەردى. الماتى قالاسىنىڭ سىزعانوۆ اتىنداعى ۇلتتىق حيرۋرگيا عىلىمي ورتالىعىندا باۋىر ترانسپلانتاتتاۋ، استانا قالاسىنىڭ ۇلتتىق عىلىمي كارديوحيرۋرگيالىق ورتالىعىندا جۇرەك جانە وكپە الماستىرۋ، ال استانا قالاسىنىڭ انا مەن بالا ۇلتتىق عىلىمي ورتالىعىندا- ەكى بالاعا بۇيرەك اۋىستىرۋ وتاسى جۇرگىزىلدى.
بارلىق وپەراتسيا ءساتتى ءوتتى، پاتسيەنتتەردىڭ دەنساۋلىعى قاناعاتتانارلىق. دارىگەرلەردىڭ ايتۋىنشا، ەكى دونور وسكەمەن جانە پاۆلودار قالالارىنان كەلگەن. ولاردىڭ كومەگىمەن اعزا ترانسپلانتاتتاۋدى ۇزاق ۋاقىت كۇتكەن 9 پاتسيەنت قۇتقارىلدى.
«اعزالاردى ترانسپلانتتاۋ جونىندەگى ءىس- شارالارعا قاتىسقان پاۆلودار جانە وسكەمەن قالالارىنىڭ دەنساۋلىق ساقتاۋ ۇيىمدارىنىڭ بارلىق مەديتسينا قىزمەتكەرىنە، جپق قىزمەتتەرىنە، سونداي-اق «ق ت ج» ۇ ك» ا ق جانە پاۆلودار قالاسى اۋەجايىنىڭ باسشىلارىنا كۇردەلى مەتەوجاعدايلاردا ترانسپلانتولوگ دارىگەرلەر بريگادالارىنىڭ ءجۇرىپ- تۇرۋىنا كورسەتكەن قولداۋى ءۇشىن العىس بىلدىرەمىز»، - دەلىنگەن حابارلامادا.
اعزانى قىسقا مەرزىمدە ترانسپلانتاتتاۋ بويىنشا ۆيرتۋوزدىق جۇمىستى ترانسپلانتولوگ حيرۋرگتار ورىندادى.
