IX قىسقى ازيا ويىندارىنىڭ باستالۋىنا 30 كۇن قالدى

استانا. KAZINFORM - قىتايدىڭ حاربين قالاسىندا وتەتىن IX قىسقى ازيا ويىندارىنىڭ باستالۋىنا 30 كۇن قالدى.

قىسقى ازيا ويىندارى اتقارۋ كوميتەتىنىڭ سپورتتىق جارىستار دەپارتامەنتىنىڭ ديرەكتورى جانە جارىستى باسقارۋ ورتالىعى قولباسشىسىنىڭ ورىنباسارى لي گۋاننىڭ ايتۋىنشا، ازيانىڭ 34 ەلىنەن/ايماقتارىنان بارلىعى 1275 سپورتشى (755 ەر، 520 ايەل) تىركەلدى. ولاردىڭ اراسىندا مۇز سپورتىنا 847 سپورتشى (513 ەر، 334 ايەل) جانە قارداعى سپورت تۇرىنە 428 سپورتشى (ەرلەر 242 ادام، 186 ايەل) قاتىسادى.

بۇعان دەيىن حابارلاعانىمىزداي، ءدۇبىرلى دودا تاريحتا ەڭ كوپ ەل قاتىسقان قىسقى ازيادانىڭ ءبىرى بولماق.

سونداي-اق، كامبودجا مەن ساۋد ارابياسى قىسقى ازيا ويىندارىنا العاش رەت قاتىسقالى وتىر.

حاربين قالاسى قىسقى ازيا ويىندارىن ەكىنشى مارتە وتكىزگەلى وتىر. بۇعان دەيىن، Ⅲ قىسقى ازيا ويىندارى 1996-جىلى وسى قالادا ءوتىپ، 17 ەل/ايماقتان كەلگەن 458 سپورتشى سىنعا تۇسكەن بولاتىن. قازاقستان قۇراماسى سول جىلى 14 التىن، 9 كۇمىس، 8 قولا (بارلىعى 31) جۇلدەمەن جالپى ەسەپتە جارىس قوجايىنىنان كەيىنگى 2-ورىننان كورىنگەن.

ەسكە سالساق، IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.

ق ر تۋريزم جانە سپورت مينيسترلىگىنىڭ حابارلاۋىنشا، قازاقستاننان 139 سپورتشى ەل نامىسىن قورعايدى.

وسىعان دەيىن اق ازيادانىڭ حاربين قالاسىنداعى مۇز سپورتى وتەتىن 5 ارەنا جانە يابۋلي تاۋ شاڭعىسى كۋرورتىندا قار سپورتى وتەتىن 8 جارىس الاڭىندا وتەتىنىن جازعان ەدىك.

اۆتور مۇحتار قاليموللا ۇلى