حالىقتىڭ سەنىمى - ءاميان ەمەس: پەريزات قايرات سوتىندا پروكۋرور مالىمدەمە جاسادى

استانا. KAZINFORM - استانادا پەريزات قايراتقا قاتىستى قىلمىستىق ءىس بويىنشا تاراپتاردىڭ جارىس ءسوزى باستالدى. مەملەكەتتىك ايىپتاۋشى ءمادينا ورازالينا سوتتا ءسوز سويلەپ، ايىپتاۋدىڭ باستى ۇستانىمى - قايىرىمدىلىقتى جەكە باستىڭ مۇددەسىنە پايدالانۋعا جول بەرمەۋ ەكەنىن ايتتى.

- قايىرىمدىلىق جەكە مۇددە ءۇشىن پايدالاناتىن سىلتاۋ بولا المايدى. ەندى باس پايداسى ءۇشىن قوعامنىڭ الەۋمەتتىك سەزىمتالدىعىن قولدانىپ قالعىسى كەلگەندەر مىنانى ءبىلۋى كەرەك: مەملەكەت بۇعان كوز جۇمىپ قارامايدى، ال حالىقتىڭ سەنىمى - شەكسىز ەمەس. مەيىرىم مەن وزگەنىڭ قايعىسىن پايداعا اسىرۋدىڭ اراسىندا ايقىن شەكارا بولۋى كەرەك، - دەدى م. ورازالينا.

پروكۋروردىڭ ايتۋىنشا، بۇل ءىس الەۋمەتتىك ماڭىزى بار تاقىرىپتاردى ءوزىن كورسەتۋ قۇرالىنا اينالدىرعاندارعا ەسكەرتۋ بولۋى كەرەك.

- ەگەر بىرەۋ تاعى دا ىزگىلىك بەتپەردەسىن تاعىپ، قازاقستاندىقتاردىڭ جومارتتىعى ارقىلى پايدا تاپقىسى كەلسە، ونى قوشەمەت ەمەس، سوت كۇتىپ تۇر. حالىقتىڭ سەنىمى - برەند تە، ءاميان دا ەمەس، بۇل امانات. ال اماناتقا قيانات جاساعان ادام جۇرتشىلىق الدىندا اشكەرە بولادى. قازاقستان تاريحىندا شىن مەتسەناتتار بولعان - ولار كومەكتى ءۇنسىز، كامەراسىز كورسەتكەن، - دەپ اتاپ ءوتتى مەملەكەتتىك ايىپتاۋشى.

بۇعان دەيىن پەريزات قايرات دايىن ديپلوم ساتىپ العىسى كەلگەن ارەكەتى تۋرالى جازعان ەدىك.

سونداي-اق كۋاگەر پەريزات قايرات قور قارجىسىن قالاي قولما-قول اقشاعا اۋدارعانىن ايتىپ بەردى.

سوت بارىسىندا ايگىلى ءانشى، وتانداسىمىز ديماش قۇدايبەرگەننىڭ ەسىمى اتالدى.

بەلگىلى بولعانداي تاسقىن كەزىندە نازاربايەۆ زياتكەرلىك مەكتەبىنىڭ قىزمەتكەرلەرى 2,9 ميلليون تەڭگە جولداعان.

ءىستى قاراۋ كەزىندە پەريزات قايرات جەتەكشىلىك ەتكەن قورعا قارجى اۋدارعان 47 ادام جابىرلەنۋشى دەپ تانىلدى.

اۆتور

ايجان سەرىكجان قىزى