حالىققا بەرىلەتىن كرەديتتەر ءوسىپ كەلەدى - ۇلتتىق بانك

استانا. KAZINFORM – ق ر ۇلتتىق بانكىنىڭ ءتوراعاسى تيمۋر سۇلەيمەنوۆ حالىققا بەرىلەتىن كرەديتتەر ارتقانىن، اسىرەسە تۇتىنۋشىلىق كرەديتتەر %34,5 كە وسكەنىن ايتىپ وتىر.

несие
Коллаж: Kazinform

− حالىققا بەرىلەتىن كرەديتتەر ءوسىپ كەلەدى. ونىڭ ءوسىمى %24,4 قۇرادى. ونىڭ ىشىندە تۇتىنۋشىلىق كرەديتتەر %34,5 كە ءوستى. حالىقتىڭ شامادان تىس بەرەشەگىن بولدىرماۋ ءۇشىن قارجى رەتتەۋشىلەرىنىڭ، ۇكىمەت پەن پارلامەنتتىڭ ورتاق باستاماسىمەن زاڭ قابىلداندى. مەرزىمى وتكەن بەرەشەگى بار ازاماتتارعا كرەديت بەرۋگە تىيىم سالىندى. قارىزداردى كوللەكتورلارعا بەرۋگە ەكى جىلدىق موراتوريي ەنگىزىلدى. تۇتىنۋشىلىق قارىزداردىڭ ەڭ جوعارى سوماسى بەلگىلەندى. قارىز الۋشىنىڭ بورىشىن شەكتەيتىن جاڭا نورماتيۆ ەنگىزىلدى، − دەدى ۇلتتىق بانك ءتوراعاسى مەملەكەت باسشىسىنىڭ قاتىسۋىمەن وتكەن ۇكىمەت وتىرىسىندا.

دەگەنمەن، سپيكەر تۇتىنۋشىلىق كرەديتتەۋدىڭ قارقىنى ءالى دە جوعارى ەكەنىن اتاپ ءوتتى.

− نارىقتىڭ دامۋىن جانە حالىقتىڭ كرەديتتىك جۇكتەمەسىنىڭ ءوسۋىن قوسىمشا رەتتەگەن ءجون دەپ سانايمىز. وسىعان وراي بيىل قارجى نارىعىن رەتتەۋ اگەنتتىگىمەن بىرلەسىپ جەكە تۇلعالاردى كرەديتتەۋ سەگمەنتىندە كاپيتالدىڭ كونترتسيكلدىك بۋفەرىن قولدانۋ ماسەلەسىن جانە باسقا دا شارالاردى ازىرلەيمىز، - دەدى ت. سۇلەيمەنوۆ.

بۇعان دەيىن پرەزيدەنت قاسىم-جومارت توقايەۆ حالىقتى ۇلتتىق ۆاليۋتانىڭ قۇبىلمالىلىعى الاڭداتىپ وتىرعانىن، ۇلتتىق بانك جۇمىسىنا ءالى دە سۇراقتار بارىن ايتقان ەدى.

سوڭعى جاڭالىقتار